سەنتەری پشتیوانی بۆ خاوەن پێداویستی تایبەت لە زانكۆكان دادەمەزرێت

ئاڤا نیوز

وەزارەتی خوێندنی باڵا و توێژینەوەی زانستی حكومەتی هەرێمی كوردستان، دامەزراندنی سەنتەری پشتیوانی بۆ كەسانی خاوەن پێداویستیی تایبەت لە هەموو زانكۆكانی هەرێمی كوردستان ڕادەگەیێنێت.

وێنە گەورەكە: پەرلەمانی كوردستان لە ساڵی 2021 یاسای ژمارەی 22 ساڵی 2011ی هەموار كردەوەو وەكو یاسای ژمارە هەشت بڵاوكرایەوە، لە یاساكە ماف و ئیمتیازەكانی كەسانی خاوەن پێداویستی تایبەتی دیاریكردووە.

لێدوانی فەرمی: عەباس ئەكرەم، وتەبێژی وەزارەتی خوێندنی باڵا و توێژینەوەی زانستی بە ئاڤا نیوزی ڕاگەیاند: سەنتەرەكە بە هاوكاری دامەزراوەی ئامیدیست دەبێت، مەبەست لە پڕۆژەكە بەردوامیدانی خاوەن پێداویستییە تایبەتەكانە لە خوێندنی زانكۆی و كارئاسانییان بۆ دەكرێت.

زانیاریی زیاتر: ئەو شاندەی دامەزراوەی ئامیدیست بڕیارە سەردانی هەموو زانكۆكانی سنووری پارێزگای هەولێر، سلێمانی و دهۆك بكەن، تا بزانن بە چ میكانیزمێك ئەو سەنتەرانە بخرێنە بواری جێبەجێكردنەوە، بەڵام هێشتا هیچ وردەكارییەك لەسەر سەنتەرەكان نەخراوەتەڕوو.

باكگراوند: ئامیدیست دامەزراوەیەكی ئەمریكیە لە ساڵی 1951 دامەزراوە، چالاكیەكانی لەبواری پەروەردە و ڕاهێنانە لە وڵاتانی ڕۆژهەڵاتی ناوەڕاست و ئەفریقا.