پەرلەمانتارێکی پێشووی تورکمان: بەشداری هەڵبژاردن دەكەین بەڵام ناڕازین

ئاڤا نیوز

 

بەربژێرێكی توركمان دەڵێت بەشداری هەڵبژاردن دەكەن، بەڵام لە كەمكردنەوەی كورسی كۆتای پێكهاتەكان لە پەرلەمانی كوردستان ناڕازین.

لێدوانی فەرمی: محەممەد سەعدەدین بەربژێری پێکهاتەی تورکمان بە ئاڤا نیوزی گوت: بۆ کێبڕکێ لەسەر کورسی تورکمان بۆ بازنەی هەولێر لە ئۆفیسی هەولێری کۆمیسیۆن خۆم تۆمار کرد، بۆ ئەوەی بتوانین لە خولی شەشەمی پەرلەمان بەشدار بین و بتوانین نوێنەرایەتی پێکهاتەی تورکمان بکەین.

لەلایەکی دیکەوە: محەممەد سەعدەدین کە لە خولی پێنجەمی پەرلەمانی کوردستان پەرلەمانتار بوو، دەڵێت هەرچەندە بەشداریی هەڵبژاردن دەکەن بەڵام ناڕازین لە کەمکردنەوەی کورسی کۆتا و شێوازی دابەشکردنیان بەسەر بازنەکان بە ناداپەروەری دەبینێت.

جەختیش دەکاتەوە هەوڵ دەدەن لە خولی حەوتەمی پەرلەمانی کوردستان وەکو پێشتر 11 کورسی کۆتاکان بگەڕێننەوە و دابەشکردنیشیان بە شێوەیەکی دادپەروەرانە بێت.

ئەوەی پێویستە بیزانیت: لە بازنەی  هەولێر دوو کورسیی کۆتا بۆ پێکهاتەکان دانراون، یەكێکیان بۆ تورکمان و ئەوەی دیکەشیان بۆ کریستیانەکانە، بەگوێرەی ڕێنمایی کۆمیسیۆنیش بەربژێری کۆتاکان نابێت لەنێو هیچ لیستێکدا بن.