لە ساڵێکدا 40 ناوچەی شوێنەواری نۆژەن کراونەتەوە

ئاڤا نیوز

 

ساڵانە حکومەتی هەرێمی کوردستان 900 ملیۆن دینار بۆ کەرتی شوێنەوار خەرج دەکات، بەڕێوەبەری گشتیی شوێنەوار ئاماژە بەوە دەدات، بەو پارەیە نزیکەی 40 ناوچەی شوێنەواری نۆژەن کراوەتەوە.

 

وێنە گەورەکە: لە کابینەی نۆیەمی حکومەتی هەرێمی کوردستان، بۆ یەکەمجارە بودجەی ساڵانە تەرخان دەکرێت بۆ پەرەپێدان و نۆژەنکردنەوەی شوێنەوار.

 

لێدوانی فەرمی: کەیفی مستەفا بەڕێوەبەری گشتیی شوێنەواری هەرێمی کوردستان بە ئاڤا نیوزی ڕاگەیاند، مانگی دەی ساڵی 2021 حکومەتی هەرێمی کوردستان ڕەزامەندیدا لەسەر ملیارێک دینار، بەڵام وەزارەتی دارایی گرفت بۆ خەرجکردنی ئەو پارەیە دروست دەکات و تەنیا یەک ساڵ بۆمان خەرجکراوە.

 

زانیاریی زیاتر: بەڕێوەبەری گشتی شوێنەوار دەڵێت: بەو 900 ملیۆن دینارە توانراوە لە کفری بۆ زاخۆ دەیان ناوچەی شوێنەواری نۆژەن بکرێتەوە، بەڵام ئەوەی گرفتە بۆ بەڕێوەبەرایەتیەکانی شوێنەوار نەبوونی ئۆتۆمبێلە، تەنانەت بە هەموو بەڕێوەبەرایەتییەکان تەنیا یەک ئۆتۆمبێلمان هەیە.

 

باکگراوند: لە هەرێمی کوردستان نزیکەی شەش هەزار پێگەی شوێنەوار دیاریکراون، کارکردن لە زۆربەی شوێنەوارەکان بەردەوامی هەیە.