لە سلێمانی سیستەمی غازی باڵەخانەیەک دەتەقێت و کەسێک گیان لەدەست دەدات

ئاڤا نیوز

 

لە گەڕەکی ئاشتیی سلێمانی ئاگرێکی گەورە لە باڵەخانەیەک کەوتەوە و بەپێی زانیارییەکان بەهۆی تەقینی سیستەمی غازی LPG بووە و کەسێک گیانی لەدەست داوە.

 

چیرۆکی سەرەکی: کاتژمێر 9:20 خولەکی بەیانی وەستایەک لە سەربانی باڵەخانەیەک لە گەڕەکی ئاشتی سلێمانی کاری لەحیمی بۆ تانکی غاز کردووە، بەهۆیەوە سیستەمی غازی باڵەخانەکە ئاگری گرتووە و تەقیوەتەوە.

 

لە پەیامنێرەوە: ژیوار عەبدولڕەحمان، پەیامنێری ئاڤا نیوز دەڵێت بەهۆی ڕووداوەکەوە وەستاکە کە بەڕەچەڵەک ئێرانییە گیانی لەدەست داوە، ئاگرەکەش لەلایەن تیمەکانی بەرگریی شارستانی کۆنترۆڵ کراوە.

 

ئەوەش بزانە: لە مانگی 11ـی 2022 بەهۆی تەقینەوەی سیستمی غاز لە ماڵێکدا لە سلێمانی 14 کەس گیانیان لەدەست دا، هاوکات لە 22-11-2022 بەهۆی تەقینەوەی تانکی غاز لە سەربانی بەشە ناوخۆییەک لە دهۆک چوار کەس گیانیان لەدەست دا و 33ـی دیکە بریندار بوون، لە 3-7-2022 بەهۆی تەقینەوەی غاز لە کافتریایەک لە شەقامی سالمی سلێمانی پێنج کەس برینداربوون.