بۆچی شاندەکەی ئێران سەردانی هەولێر و سلێمانی دەکات؟

ئاڤا نیوز

 

نوێنەری حکومەتی هەرێمی کوردستان لە ئێران ڕایگەیاند، شاندی ئێران سەردانی هەولێر و بەغدا دەکات بۆ تاوتوێکردنی پرسە ئەمنی، بازرگانی, ئابووری و سیاسییەکان. 

 

وێنە گەورەکە: دوای سەردانەکەی بۆ بەغدا، ڕۆژی هەینی 14-06-2024  عەلی باقر کنی، سەرپەرشتیاری کاروباری وەزارەتی دەرەوەی ئێران سەردانی هەولێر دەکات و سێ کۆبوونەوەی دەبێت، لەگەڵ هەریەک لە سەرۆک بارزانی، نێچیرڤان بارزانی، سەرۆکی هەرێمی کوردستان و سەرۆکوەزیران بارزانی کۆدەبێتەوە، دواتر سەردانی سلێمانی دەکات و لەگەڵ بافڵ تاڵەبانی و قوباد تاڵەبانی کۆدەبێتەوە.

 

لێدوانی فەرمی: سێ ڕۆژ پێش ئێستا بەرنامەی سەردانی شاندەکەی ئێران بڵاوکرایەوە، بڕیارە  سەرلەبەیانی ڕۆژی هەینی بگاتە هەولێر و لەگەڵ سەرۆک مەسعود بارزانی و نێچیرڤان بارزانی، سەرۆکی هەرێمی کوردستان و سەرۆکوەزیران بارزانی کۆببێتەوە، لەبارەی سەردانەکەشی بۆ سلێمانی نازم دەباغ، نوێنەری حکومەتی هەرێمی کوردستان لە ئێران  بە ئاڤا نیوزی گوت، دواتر ئەندامانی شاندەکە بە فڕۆکەی تایبەتی خۆیان دەچنە سلێمانی و دیدار و گفتوگۆیان لەگەڵ بافڵ تاڵەبانی و قوباد تاڵەبانی دەبێت.

 

زانیاریی زیاتر: دیدار و گفتوگۆکان بەگشتی لەسەر پرسە ئەمنی، فەرهەنگی، سیاسیی، بازرگانی و ئابوورییەکان دەبێت، هەروەها سوورن لەسەر جێبەجێکردنی ڕێککەوتنەکانی ئیبراهیم ڕەئیسی، سەرۆککۆماری کۆچکردووی ئێران و نێچیرڤان بارزانی، سەرۆکی هەرێمی کوردستان. نازم دەباغ وای گوت.