سەربازێکی تورکیا و چوار گەریلای پەکەکە لە هەرێمی کوردستان دەکوژرێن

ئاڤا نیوز

 

وەزارەتی بەرگریی تورکیا، کوشتنی چوار گەریلای پەکەکەی لە هەرێمی کوردستانی ڕاگەیاند و پەکەکەش دەڵێت، سەربازێکی تورکیایان کوشتووە.

 

وێنە گەورەکە: دەیان ساڵە بەهۆی بوونی پەکەکە ناوچە سنوورییەکانی پارێزگای دهۆک بە تایبەت قەزای ئامێدی، دۆخێکی ناسەقامگیریان هەیە و بە بەردەوامیی بۆردوومان دەکرێن.

 

ڕاگەیێنراوی فەرمی: وەزارەتی بەرگریی تورکیا ڕایگەیاند، سوپایەکەیان لە ڕووبەڕووبوونەوەی پەکەکە بەردەوامە، لەو چوارچێوەیەشدا چوار گەریلای پەکەکە لە ناوچەی ئۆپەراسیۆنی ‘چنگ-قفڵ’ لە هەرێمی کوردستان کوژراون.

 

لەلایەکی دیکەوە: ناوەندیی ڕاگەیاندنی هێزەکانی پاراستنی گەل (هەپەگە) کە باڵی سەربازیی پەکەکەیە ڕایگەیاند، لە دوو ڕۆژی ڕابردوودا گەریلایەکانیان لە سنووری ئامێدی شەش چالاکییان دژ بە هێزەکانی تورکیا هەبووە، بەهۆیەوە سەربازێک کوژراوە و زیان بە بارەگاکانیان گەیشتووە.

 

ئەوەی پێویستە بیزانیت: بەهۆی شەڕ و ئاڵۆزیەکانی تورکیا و پەکەکە، دەیان هاووڵاتیی مەدەنی لە هەرێمی کوردستان شەهید بوونە و سەدان گوندیش چوڵکراون.