پەیامی سەرۆک بارزانی لەبارەی گەڕاندنەوەی کورسیی پاتریاکی کلدانی عێراق و جیهان

ئاڤا نیوز 

 

سەرۆک بارزانی پەیامێکی لەبارەی گەڕاندنەوەی کورسیی پاتریاکی کلدانی عێراق و جیهان بڵاوکردەوە و دەڵێت، هەنگاوێکی ڕاستە و لەجێی خۆیەتی.

 

وێنە گەورەکە: ئێوارەی ڕۆژی سێشەممە 12-06-2024 له‌ به‌غدا، فەرمانی ده‌ستبه‌كاربوونی کاردیناڵ لویس ڕافائیل ساکۆ وەک پاتریاکی کلدانەکانى عێراق و جیهان له‌لایه‌ن حازم وەتەن، ڕاوێژکاری محەممەد شیاع سوودانیه‌وه‌ ڕاگەیێنرا.

 

لێدوانی فەرمی: سەرۆک بارزانی لەبارەی بڕیاری گەڕاندنەوەی کورسیی پاتریاکی کلدانی عێراق و جیهان پەیامێکی لە تۆڕی کۆمەلایەتیی ئێکس بڵاوکردەوە و ڕایگەیاند: بڕیاری گەڕاندنەوەی کورسیی پاتریاکی کلدانی عێراق و جیهان هەنگاوێکی ڕاست و لەجێی خۆیەتی و دەستخۆشی لە محەممەد شیاع سوودانی سەرۆکوەزیرانی عێراق دەکەم.

 

ئەوەی پێویستە بیزانیت: ڕۆژی هەشتی تەممووزی ساڵی ڕابردوو، لەتیف ڕەشید، سەرۆککۆماری عێراق فەرمانی هەڵوەشاندنەوەی بڕیاری کۆماریی ژمارە147ـی ساڵی 2013ـی دەرکرد كه‌ كاردیناڵ لویس ساکۆی وه‌ك پاتریارکی کلدانییەکانی عێراق و جیهان ده‌سنیشان كردبوو.

 

زانیاریی زیاتر: لە ڕێکەوتی 21-07-2023، دوای جێهێشتنی بەغدا، کاردیناڵ لویس روفایل ساکۆ، پاتریارکی کڵێسای کلدانی لە عێراق و جیهان، ڕووی لە هەولێر کرد و زیاتر لە ساڵێک لە پایتەختی هەرێمی کوردستان مایەوە.