ئومێد خۆشناو: پاڵاوگە نایاساییەکان دادەخرێن

ئاڤا نیوز

پارێزگاری هەولێر ڕایدەگەیێنێت، وەرگرتنی مۆڵەتی پاڵاوگەکان لە دەسەڵاتی سامانە سرووشتییەکاندایە، بەدواداچوون دەکەن و هەر پاڵاوگەیەک مۆڵەتی نەبێت و بە نایاسایی کار بکات دادەخرێت.

وێنە گەورەکە: کاتژمێر 08:30 خولەکی شەوی ڕابردوو ئاگر لە پاڵاوگەیەکی نەوت و گاز لە ڕێگەی گوێڕ کەوتەوە، تاوەکو ئێستا کۆنتڕۆڵ نەکراوە و نزیکەی 16 کاتژمێرە بەردەوامە، چەند کاتژمێری دیکەش دەخایەنێت تاوەکو سووتەمەنی نێو عەمبارەکان بەتەواوی دەسووتێت.

کۆنگرەی ڕۆژنامەوانی: ئومێد خۆشناو، پارێزگاری هەولێر هۆکاری کەوتنەوەی ئاگرەکەی ئاشکراکرد و گوتی: هۆکارەکە کارەبای موەلیدەی تانکەرێکی سووتەمەنی بووە، دواتر عەمبارەکە بەتەواوی ئاگری گرتووە، بەهۆی ماددە سووتەمەنییەکانیشەوە عەمباری دووەمیش سووتاوە.

زیانە سەرەکییەکان: پارێزگاری هەولێر ئاماژەی بەوە کرد کە هیچ کەسێک بەهۆی ڕووداوەکەوە گیانی لەدەست نەداوە، سێ کارمەندی بەرگری شارستنی بریندارن و ژمارەیەک ئۆتۆمبێل زیانیان بەرکەوتووە، زیانە ماددییەکانیش بە 8 ملیۆن دۆلار دەخەمڵێنرێن. بە کۆی گشتیش 10 کەس بریندارن و نۆ ئۆتۆمبێل سووتاون.

گۆشەیەکی دیکە: لەبارەی نایاساییبوونی پاڵاوگەکە ئومێد خۆشناو گوتی، بەدواداچوون بۆ دەکەن. باسی لەوەش کرد وەرگرتنی مۆڵەتی ئەو پاڵاوگانە لە دەسەڵاتی سامانە سرووشتییەکاندایە، جەختیشی کردەوە هەر پاڵاوگەیەک بە نایاسایی کار بکات دادەخرێت.