پارێزگاری هەولێر: قیستی درێژخایەن بە زیانلێکەوتووانی بازاڕی قەیسەری دەدرێت

ئاڤا نیوز

 

پارێزگاری هەولێر ڕایگەیاند، هێشتا لێکۆڵینەوەکان لەسەر ڕووداوی ئاگرکەوتنەوەکەی بازاڕی قەیسەری بەردەوامە، چەند کەسێک دەستگیرکراون و لێکۆڵینەوەیان لەگەڵدا کراوە.

 

وێنە گەورەکە: ڕۆژی 5-5-2024 بازاڕی قەیسەریی هەولێر ئاگری گرت و بەهۆیەوە 227 دووکان و حەوت کۆگا سووتان.

 

لێدوانی فەرمی: ئومێد خۆشناو، پارێزگاری هەولێر لە کۆنگرەیەکی ڕۆژنامەوانیدا گوتی: دوای سەردانەکەی سەرۆکوەزیران بارزانی بۆ بازاڕەکە، لەلایەن دوو کۆمپانیاوە کاری نۆژەنکردنەوەی بازاڕەکە دەستی پێکردووە، هەوڵدەدرێت زووتر کارەکانی تەواو بکرێت.

 

زانیاریی زیاتر: پارێزگای هەولێر لەگەڵ بانکی جیهان ڕێککەوتن کردووە کە قیستی درێژخایەنی سێ بۆ چوار ساڵ بەبێ سوو بە زەرەرمەندبووانی بازاڕی قەیسەری بدرێت، دوای جەژنی قوربان پرۆسەکە دەست پێ دەکات.

 

ئەمەش بزانە: بڕی پێنج ملیار و 300 ملیۆن دینار بۆ نۆژەنکردنەوەی بازاڕەکە تەرخان کراوە، جگە لەوەش حکومەت بڕیاری بەخشینی 50%ـی باجی 2023 و 100%ـی باجی 2024ـی بۆ زیانلێکەوتووان دەرکردووە، سەرەڕای بەخشینیان لە باجی تابلۆ و خاشاک بۆ ماوەی ساڵێک.