تورکیا: ئێمە نەمانهێشت هەڵبژاردن لە [ڕۆژئاوای کوردستان] بکرێت

ئاڤا نیوز

وەزارەتی بەرگریی تورکیا جەخت لەسەر ڕێگریکردنی تورکیا لە هەڵبژاردنەکانی ڕۆژئاوای کوردستان دەکاتەوە و دەڵێت "ئێمە نەمانهێشت بکرێت".

وێنە گەورەکە: بڕیاربوو لە 11-6ی ئەمساڵ هەڵبژاردنی شارەوانییەکان لە ڕۆژئاوای کوردستان و ناوچەکانی ژێر دەسەڵاتی "ئیدارەی خۆسەر" لە سووریا بکرێت، بەڵام بەهۆی ڕێگرییەکانی تورکیا و سووریا و نەبوونی پشتیوانی ئەمریکا بۆ دووەمجار دواخرا.

بۆچی گرنگە: سەرکەوتووبوونی هەڵبژاردن پێگەی کورد لە ڕۆژئاوای کوردستان و سووریا و ناوچەکە بەهێز دەکات و ڕەوایەتی بە دەسەڵاتی خۆسەر دەدات.

ڕاگەیێنراوی فەرمی: وەزارەتی بەرگریی تورکیا ڕایگەیاند: پێشووتر ئاگادارمان کردنەوە ئەو " بەناو هەڵبژاردنە نەک تەنیا ناکرێت، بەڵکو بەتەواوی  هەڵدەوەشێتەوە".

قووڵتر: لە بەشێکی دیکەی ڕاگەیێنراوەکەدا باس لە قسەکانی پێشووتری ڕەجەب تەیب ئەردۆغان کراوە، کە گووتویەتی "ئەو هەڵبژاردنە ناکرێت" هەر بۆیە نەکراوە.

ئەوەی پێویستە بیزانیت: هەڵبژاردنەکە بۆ مانگی هەشت دواخراوە، کۆمسیۆنی باڵای سەربەخۆی هەڵبژاردنەکانی هەرێمی باکوور و ڕۆژهەڵاتی سووریاش دەڵێت "لەسەر داخوازی ژمارەیەک لە حیزب و لیستە بەشداربووەکان" بووە.