گەشتیارانی جەژنی قوربان دوو هێندەی ئەوانەی جەژنی ڕەمەزان دەبن

ئاڤا نیوز

 

گوتەبێژی بەڕێوەبەرایەتیی گشتی گەشتوگوزاریی هەولێر ڕایگەیاند، هەموو ئامادەکارییەک بۆ پێشوازیکردن لە گەشتیاران کراوە.

 

بۆچی گرنگە: هاتنی گەشتیاران بۆ هەرێمی کوردستان جگە لە لایەنە ئابوورییەکەی، لەڕووە ئەمنییەکەشەوە دەرخەری ئەوەیە کە هەرێمی کوردستان بە شوێنێکی ئارام دادەنرێت.

 

ئەوەی پێویستە بیزانیت: ڕۆژی 16-6-2024 وەک یەکەم ڕۆژی جەژنی قوربان دیاری کراوە.

 

لێدوانی فەرمی: نەریمان فازڵ، گوتەبێژی بەڕێوەبەرایەتیی گشتی گەشتوگوزاری هەولێر گوتی: جەژنی قوربان لە وەرزی گەشتکردن و پشوودایە، ئێمە لە جەژنی ڕەمەزاندا 69 هەزار گەشتیارمان هەبوو، بەڵام چاوەڕێ دەکەین بۆ جەژنی قوربان دوو هێندەی ئەو ژمارەیە گەشتیار سەردانی پارێزگای هەولێر بکەن.

 

زانیاریی زیاتر: هەموو ئامادەکارییەک لە بازگەکان و دەروازە سنوورییەکان و ناو شار و شوێنە گەشتیارییەکان، بۆ پێشوازیکردن لە گەشتیاران کراوە، داوایان لێ دەکەین لە ناوچە ئاوییەکان خۆیان بەدوور بگرن. 

 

ئەوەش بزانە: پارێزگای هەولێر خاوەنی چەندین شوێنی گەشتیارییە کە ساڵانە هەزاران گەشتیار ڕووی لێ دەکەن، بەنموونە ناوچە گەشتیارییەکانی شەقڵاوە، ڕواندز و چۆمان.