مووچەی مانگی پێنجی پێشمەرگە و هێزە ئەمنییەکان دەنێردرێت

ئاڤا نیوز

 

لیستی مووچەی مانگی پێنجی پێشمەرگە و هێزە ئەمنییەکان بۆ بەغدا نێردراوە، سەرچاوەیەک لە وەزارەتی دارایی دەڵێت هەفتەی داهاتوو پارەکە ڕەوانە دەکرێت.

 

بۆچی گرنگە: پێشتر بەغدا بە بیانووی نەناردنی ناوی هێزە ئەمنییەکان، گرفتی بۆ ناردنی مووچە دروست دەکرد، بەڵام  ئێستا هەولێر ئەو بیانووەی نەهێشتووە و لەگەڵ بەغدا ڕێککەوتووە.

 

لێدوانی فەرمی: سەرچاوەیەک لە وەزارەتی دارایی و ئابووری بە ئاڤا نیوزی گوت: "پێش جەژن لیستی مووچەی مانگی پێنجی هێزە ئەمنییەکان بۆ بەغدا نێردراوە، وردبینی تەواو کراوە، ئەگەر بەغدا کێشەی دیکەی نەبێت، هەفتەی داهاتوو  پارەکە ڕەوانە دەکرێت".

 

لەلایەکی دیکەوە: هەفتەی داهاتوو لیستی مووچەی مانگی شەشی پێشمەرگە و هێزە ئەمنییەکان لەگەڵ لیستی فەرمانبەران بۆ بەغدا دەنێردرێت و لەم ماوەیە دوو مووچە لە دوای یەک وەردەگرن. 

 

ئەوەی پێویستە بیزانیت: حکومەتی هەرێمی كوردستان هەموو پابەندییەکانی خۆی بەرامبەر بەغدا جێبەجێ کردووە، بەپێی یاسای بودجە و ڕێککەوتنی نێوان هەولێر و بەغداش ناردنی مووچە مسۆگەر کراوە.