بازرگانانی سلێمانی خۆیان فێری زمانی چینی دەکەن

ئاڤا نیوز

سەنتەری لێکۆڵینەوەی چینی لەشاری سلێمانی خولێکی فێربوونی زمانی چینی کردووەتەوە، بە سەدان کەس لە مامۆستایانی زانکۆ و بازرگان و قوتابیان ناویان تۆمارکردووە.

وێنە گەورەکە: ماوەی چەند ساڵێکە خواست لەسەر فێربوونی زمانی چینی لە هەرێمی کوردستان زیادیکردووە، ئەمەش بەهۆی فراوانی ئەو پەیوەندییە بازرگانییەی هەرێمی کوردستان لەگەڵ چین هەیەتی.

ئەوەی پێویستە بیزانیت: ساڵێک دەبێت سەنتەری لێکۆڵینەوەی چینی لە زانکۆی سلێمانی کراوەتەوە.

لێدوانی فەرمی: د.یۆهان عوسمان، گوتەبێژی زانکۆی سلێمانی بە ئاڤا نیوزی گوت: بۆ یەکەمجارە لە مێژووی سلێمانی خولی زمانی چینی دەکرێتەوە، کاتێک بڵاومانکردەوە خولێکی زمانی چینی دەکرێتەوە زیاتر لە 400 کەس ناوی خۆیان تۆمار کرد و لەو ژمارەیە تەنیا 190 کەس هەڵبژێردران.

زانیاریی زیاتر: "زیاتر لە 50 بازرگان لەناو ئەو ژمارەیەن، خولەکە لەلایەن دوو مامۆستای زمانی چینی بەڕێوە دەچێت، بەهۆی زۆری ژمارەی بەشداربووان ڕۆژانە لە دوو کاتی جیاواز خولەکە دەوترێتەوە". د.یۆهان عوسمان ئەمەی گوت.