مەسعوود پزیشكیان بەبۆنەی ڕووداوێکی هەڵبژاردن پەیامێک بڵاودەکاتەوە

ئاڤا نیوز

مەسعوود پزیشكیان کە زۆرترین دەنگی لە هەڵبژاردنی ئێراندا بەدەستهێناوە، لە پەیامێكدا هاوسۆزی خۆی بۆ ئەو دوو سەربازە دەربڕی كە لەكاتی گواستنەوەی سندووقەکانی دەنگداندا کوژران.

 

وێنە گەورەكە: بەیانی ئەمڕۆ شەممە لە كاتی گواستنەوەی سندووقەكانی دەنگداندا، لە شاری ڕاسكی سەر بە پارێزگای بەلووچستان هێرش كرایە سەر کاروانێکی ئۆتۆمبێل، لە ئەنجامدا دوو پۆلیس كوژران و پێنجی دیكەش بریندار بوون.

لێدوانی فەرمی: مەسعوود پزیشكیان، بەربژێری پۆستی سەرۆككۆماری ئێران لە ئێكس نووسیویەتی:” دڵگرانم بە شەهیدبوونی ئەو دوو سەربازە، كە بێبەزەییانە و ستەملێكراوانە لە شاری ڕاسك كوژران، هاوسۆزی خۆم بۆ بنەماڵەكەیان دەردەبڕم".

ئەمەش بزانە: ڕۆژی هەینی پرۆسەی هەڵبژاردنی سەرۆکایەتیی ئێران بەڕێوەچوو. دوای سێجار درێژکردنەوە لە کۆی 61 ملیۆن کەس کە مافی دەنگدانیان هەبوو، 24 ملیۆن کەس کە دەکاتە 39٪ بەشدارییان کرد، بەپێی ئەنجامە بەراییەکانیش کە تائێستا 19 ملیۆن دەنگ جیاکراونەتەوە، مەسعوود پزیشكیان هەشت ملیۆن و 302 هەزار و 577 دەنگی بەدەستهێناوە کە دەکاتە 43.7%.