مەترسی لەسەر ژیانی پەنابەرێکی کوردی ڕۆژهەڵاتی کوردستان دروست دەبێت

ئاڤا نیوز  

بۆ دووەمجارە هەوڵی دیپۆرتکردنەوەی پەنابەرێکی کوردی ڕۆژهەڵاتی کوردستان لە نەرویجەوە بۆ ئێران دەدرێت، لە هەردوو جارەکەش ئەو پەنابەرە کوردە هەوڵی خۆ کوشتنی داوە.

وێنە گەورەکە: نوورزاد عەلی مورادی، پەنابەری کوردی خەڵکی سەرپێڵی زەهاو، ئەندامی حیزبی دیموکراتی کوردستانی ئێرانە و ماوەی هەشت ساڵە لە چاوەڕوانی وەرگرتنی مافی پەنابەریێتییە لە نەرویج.

زانیاریی بەدەستهاتوو: بەپێی ڕاپۆرتی ڕێكخراوی هەنگاو، ڕۆژی چوارشەممە 26-6-2024، نوورزاد عەلی مورادی، پەنابەری تەمەن 33 ساڵ بۆ جاری دووەم لە فڕۆکەخانەی ئیستەنبووڵی تورکیا و لە کاتی ناردنەوەی بۆ ئێران، هەوڵی داوە کۆتایی بە ژیانی خۆی بهێنێت.

ئەوەی ئێستا ڕوودەدات: بارودۆخی تەندروستیی دەروونی و جەستەیی ئەو پەنابەرە دوای دوو جار دواخستنی ڕادەستکردنەوەی جێی نیگەرانییە، ئەگەری دیپۆرتکردنەوەی دووبارەی بەشێوەیەکی جددی لە ئارادایە و لە ئەگەری ڕادەستکردنەوەشیدا چاوەڕێ دەکرێت سزای قورسی بەسەردا بسەپێنرێت.