ب درێژاهیا خابیری د ناڤ زاخۆ دا دێ کۆڕنیش هێتە دروستکرن

ئاڤا نیوز

پرۆژەیێ کۆڕنیشێ زاخۆ کو د سەردەمێ کابینەیا نەهێ یا حکومەتا هەرێما کوردستانێ دا دەست ب دروستکرنێ هاتیە کرن، ژ پرۆژەیێن ستراتیژییێن ئێدارا سەربەخۆیا زاخۆیە و کارێن قۆناغا دووێ دەستپێکرینە.

داخویانیا فەرمی: موشیر محەممەد، قایمقامێ قەزا ناڤەندییا زاخۆ بۆ ئاڤا نیوز ڕاگەهاند، قۆناغا دووێ ب درێژاهیا پێنج کێلومەتر و نیڤانە، تا نوکە پترى 15% تەمام بوویە. 15 ملیار دینار هاتنە تەرخانکرن و ئەڤ قۆناغە خارنگەهـ، کافتریا، دوو سکرێن ئاڤێ، رێکا پیادە و باخچەیێن کەسکاتییێ لبەر لێڤێن خابیری لخۆ دگریت، سێ کۆمپانییێن ناڤخۆ و بیانى کارتێدا دکەن.

 

زانیاریێن زێدەتر: تەمام کرنا قۆناغا دوویێ یا کۆرنیشێ پرا دەلال دگەل یا ئێکێ تاکو دگەهیتە د ناڤ بازاری دا دێ بیتە زێدەترى هەشت کیلۆمەتران، بڕیارە د ئەڤ سالەدا ب داوى بهێـت. پشتى داویهاتنا قۆناغا دوویێ ژى دێ دەست ب قۆغانا سێ هێتەکرن، دێ ب درێژاهیا خابیری ل سەنتەرێ باژێرێ زاخۆ  کۆرنیش هێتە دروستکرن. 

ئەوا پێدڤیە بزانی: دەما قۆناغا ئێکێ یا کۆڕنیشی تەمام بووی، پێشوازییەکا مەزن ژ لایێ خەلکی ڤە هەبوو و وی پرۆژەی سەدان دەرفەتێن کاری پەیداکرن و بەرێ هزاران گەشتیاران دانە زاخۆ، دهێتە چاڤەڕێکرن ب تەمام بوونا کۆڕنیشی، زاخۆ بەرەڤ ئاستەکێ دی یێ پێشڤەچوونێ بچیت د کەرتێ گەشتیاری دا.

 

ژمارە بڤی ڕەنگینە: ل دویڤ ئامارەکا گەشتوگوزارا زاخۆ، بتنێ د 10 رۆژێن دوماهیکا سالا 2023ێ دا 97 هزار گەشتیاران قەستا ئیدارەیا سەربەخۆیا زاخۆ کرینە ب مەرەما بەشداریکرن د ئاهەنگێن سەرێ سالێ دا ل پرۆژەیێ گەشتیارییێ کۆڕنیشی.

 

باکگراوند: قۆناغا ئێکێ یا پرۆژەیێ گەشتیاریێ کۆرنیشێ دەلال ل زاخۆ، ب کۆژمێ 11 ملیار و 500 ملیۆن دیناران ژ لایێ حکومەتا هەرێما کوردستانێ ڤە ب درێژاهیا هزار و 500 مەتران لسەر هەردوو روویێن خابیری هاتیە دروستکرن، د ناڤ کۆڕنیشی دا سکرەک هەیە ب درێژاهیا 73 مەتر و ب بلنداهیا 3.5 مەتران هاتیە چێکرن و شیانێن لخۆ گرتنا زێدەتری 250 هزار مەترێن سێجایێن ئاڤێ هەنە و 70% یا وی پرۆژەی کەسکاتییە.