ئەمساڵ ئاماری کوژران و برینداربوونی کۆڵبەران دووهێندەیە

ئاڤا نیوز

بەپێی ئامارەکان لە شەش مانگی سەرەتای ئەمساڵدا ڕێژەی کوژران و برینداربوونی کۆڵبەران دوو هێندەی ساڵی ڕابردووە.

وێنە گەورەکە: سنوورەکانی ڕۆژهەڵات لەگەڵ باشووری کوردستان، شوێنی کارکردنی سەدان کۆڵبەری ڕۆژهەڵاتی کوردستانە، بەڵام ئەوان ڕووبەڕووی مەترسی کوشتن و سەرما و سەختی دەبنەوە.

لێدوانی فەرمی: ئەرسەلان یارئەحمەدی، سەرۆکی ڕێکخراوی هەنگاو بۆ مافەکانی مرۆڤ بە ئاڤا نیوزی ڕاگەیاند: "دوێنێ منداڵێکی کۆڵبەری تەمەن 15 ساڵی خەڵکی سەردەشت، بەهۆی تەقەی ڕاستەوخۆی پاسداری سەر سنوور بریندار کراوە و برینەکەی سەختە".

زانیاریی زیاتر: ئەرسەلان یارئەحمەدی دەڵێت: لە شەش مانگی یەکەمی ئەمساڵ 38 کۆڵبەر کوژراون، 233 کۆڵبەریش بریندار کراون، ئەم ژمارەیە دوو هێندەی تێکڕای ساڵی پارە و ڕێژەکە زۆر زیادی کردووە.