سەرۆکوەزیران بارزانی: چیدی بابەتی مووچە نابێتە هەواڵ

ئاڤا نیوز

 

لە کۆبوونەوەی لەگەڵ دانیشتووانی سنووری پارێزگای سلێمانی سەرۆکوەزیران بارزانی گوتی، "مووچە کەوتووەتە سەر ڕێچکەی خۆی".

 

وێنە گەورەکە: لەماوەی ڕابردوودا بۆ چەندینجار سەرۆکوەزیران بارزانی لەگەڵ هاونیشتمانییانی ناوچە جیاوازەکان دیداری بەکۆمەڵی هەبووە و گوێی لە کێشەی هاونیشتمانییانی ئەو ناوچانە گرتووە، دوایین دیداریشی لەگەڵ خەڵکی پارێزگای سلێمانی بوو و ئەمشەو بەشی یەکەمی بڵاوکرایەوە.

 

لێدوانی فەرمی: سەرۆکوەزیران بارزانی لە وەڵامی  پرسیارێکدا لەبارەی مووچە گوتی: لەگەڵ حکومەتی فیدڕاڵ گەیشتووینەتە تێگەیشتنی هاوبەش و بەردەوام دەبین، مووچە دەکەوێتە سەر ڕێچکەی خۆی و پەنا بەخوا چیتر بابەتی مووچە نابێتە هەواڵی ڕۆژنامە و میدیاکان".

 

باکگراوند: لەماوەی 10 ساڵی ڕابردوودا بەهۆی بڕینی بەشە بودجەی هەرێمی کوردستان لەلایەن حکومەتی فیدڕاڵییەوە، ئاستەنگی زۆر بۆ مووچەخۆران دروست بوو، لە کابینەی نۆیەمی حکومەتی هەرێمی کوردستان کار بۆ چارەسەری بنەڕەتی بۆ ئەو کێشەیە کراوە.