ئەنجوومەنی دادوەری: پێویستە لایەن و کاندیدەکان دووربکەونەوە لە گوتاری مەزهەبی و نەتەوەیی

ئاڤا نیوز

سەرۆکی ئەنجوومەنی دادوەریی عێراق دووپاتی دەکاتەوە، هەموو ئەرکەکانی دەستوور و یاسا لە چاودێریکردنی پرۆسەی هەڵبژاردن و پاراستنی دەنگی هاووڵاتییان جێبەجێدەکات و داوای لە لایەن و کاندیدەکان کرد گوتارێکی نیشتمانی هەڵبگرن کە دوور بێت لە تائیفەگەری و هاندان دژی یەکتری.

وێنە گەورەکە: مانگێک ماوە هەڵبژاردنی پەرلەمانی عێراق بەڕێوەبچێت، دەیان لیست و حەوت هەزار و 768 کاندیدیش کێبڕکێ لەسەر 329 کورسییەکەی پەرلەمان دەکەن.

ڕاگەیێنراوی فەرمی: فایەق زێدان، سەرۆکی ئەنجوومەنی دادوەریی عێراق ڕایگەیاند: داوا لە هەموو هێزە سیاسییەکان و کاندیدان دەکەین پابەندبن بە گوتاری نیشتمانیی کۆکەرەوە و دوور بکەونەوە لە تائیفەگەری و نەتەوەیی و پێویستە ڕۆحی هاووڵاتیبوون و ئینتیما بۆ دەوڵەت بچێنن.

ناوبراو ئاماژەی بەوەشکرد، "دەسەڵاتی دادوەری لەڕێگەی ئەو ڕۆڵەی لە دەستوور و یاسادا دیاریکراوە، پابەندبوونی تەواوی خۆی دووپاتی دەکاتەوە بە چاودێریکردنی بێلایەنانە و پاراستنی دەنگی دەنگدەران و دەستەبەرکردنی بێگەردی و شەفافیەتی پرۆسەی هەڵبژاردن لە هەموو قۆناغەکانیدا، بە هەماهەنگی لەگەڵ کۆمیسیۆنی باڵای سەربەخۆی هەڵبژاردنەکان".