بەشێکی دیکەی پارەی گەنمی جووتیارانی هەرێمی کوردستان دەنێردرێت

ئاڤا نیوز

بەشی چوارەمی پارەی گەنمی جووتیارانی هەرێمی کوردستان نێردراوە، تاوەکو کۆتایی ئەم هەفتەیە دەست بە دابەشکردنی دەکرێت.

وێنە گەورەکە: ئەمساڵ حکومەتی عێراق 700 هەزار تۆن گەنم لە جووتیارانی هەرێمی كوردستان وەردەگرێت، تاوەکو ئێستا زیاتر لە 540 هەزار تۆن وەرگیراوە و لە 10 سایلۆ و دوو کۆگا کۆکراوەتەوە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی کوردستان بە ئاڤا نیوزی گوت: "تاوەکو ئێستا 70 ملیار دیناری پارەی گەنمی ئەمساڵی جووتیاران هاتووە، دوایین بەشی 10 ملیار دینارە و پێنج ملیار بۆ سلێمانی، سێ بۆ هەولێر و دوو بۆ دهۆک دەبێت".

ئەمەش بزانە: دابەشكردنی چەكی پارەی گەنم لە سایلۆکان بەردەوامە، جووتیاران لەگەڵ ڕادەستکردنی گەنمەکەیان پارەکەیان وەردەگرن.