تورکیا بە پەرۆشە بۆ ئاساییکردنەوەی پەیوەندییەکانی لەگەڵ سووریا

ئاڤا نیوز

تورکیا چاوەڕوانی ئەوەی لە ڕووسیا، ئێران و سعودیە هەیە ڕۆڵ ببینن لە ئاساییکردنەوەی پەیوەندییەکانی وڵاتەکەی لەگەڵ سووریا.

 

لێدوانی فەرمی: هاکان فیدان، وەزیری دەرەوەی تورکیا لە کۆنگرەیەکی ڕۆژنامەوانی لەگەڵ هاوتا سعوودیەکەی باسی لە هەوڵەکانی تورکیا و پێشنیازی ڕەجەب تەیەب ئەردۆغان، سەرۆککۆماری تورکیای بۆ ئاشتەوایی لەگەڵ سووریا کرد، داوای لە ئەسەد کرد ئەو بانگهێشتە بەهەند وەربگرێت و بە سعوودیەشی گوت، ئێوەش ڕۆڵی بوونیادنەر بگێرن لەم ئاشتەواییەدا.

 

لەلایەکی دیکەوە: فیدان گوتی: لە ساڵی 2017ـەوە بەنێوەندگیری ڕووسیا و ئێران لەسەر ئاستی وەزارەتی دەرەوە و هەواڵگری هەوڵی ئاساییکردنەوەی پەیوەندییەکان دراوە، لەمساڵدا سەرۆکمان داوای ئاشتەوایی دەکات، بۆ ئەمەش چاوەڕێ دەکەین "ئێران و ڕووسیا ڕۆڵی بوونیادنەر بگێڕن".

 

ئەوەی پێویستە بیزانیت: سەرەڕای ئەوەی عێراق ئامادەیی ئەوەی پێشانداوە ڕۆڵی نێوەندگیری لەنێوان تورکیا و سووریا ببینێت، ڕووسیا و ئێرانیش لە پڕۆسەکەدا هەن، داوای لە سعودیەش کرد ڕۆڵی لە نێوەندگیریەکەدا هەبێت.

 

گۆشەیەکی دیکەی دیمەنەکە: فیدان ئەو دەنگۆیانەی ڕەتکردەوە کە باس لە دەرکردنی زۆرەملێی کۆچبەرە سوورییەکان لە تورکیا دەکات.