هەنگاوی داهاتووی پرۆسەی دەوڵەتسازی لە كوردستان

لە چەند رۆژی رابردوودا پرۆسەی سەرژمێری لە عێراق و هەرێمی كوردستان سەركەوتووانە بەڕێوەچوو، ئەوە بۆ هەرێمی كوردستان هەنگاوێكی گرنگ بوو لە ڕووی دانانی پایەكانی حوكمڕانییەكی دام و دەزگایی مۆدێرن و سەردەمیانە.

 

پێش ئەوەش هەڵبژاردنی پەرلەمانی كوردستان سەركەوتووانە بەڕێوەبرا و ئێستا نۆرە هاتووەتە سەر پێكهێنانی كابینەی نوێی حكومەتی هەرێمی كوردستان، وەك هەنگاوێكی دیكەی دامەزراندنی پایە یەک لەدوای یەكەكانی حكومڕانی و دروستكردنی دام و دەزگا ئیدارییەكان لە هەرێمی كوردستان. 

 

پێكهێنانی حكومەتی ئەمجارە دوای ئەو دوو هەنگاوەی پێشوو، لایەنە سیاسییەكان دەخاتە بەردەم بەرپرسیارێتییەكی گەورە كە ئەویش دروستكردنی حكومەتێكی مۆدێرنی دام و دەزگایی بە هێزە بۆ خزمەتی خەڵک.

 

سەرەڕای هەمو ئاڵەنگاری و قەیرانەكانی بەردەم حكومەتی هەرێمی کوردستان، هەر لە بڕینی بودجە و دواخستنی بەردەوامی مووچەی فەرمانبەران و رێگریی كردن لە هەناردەكردنەوەی نەوتی هەرێمی کوردستان، بەڵام لە كوردستان ئیرادەیەک هەیە كە هەنگاوەكانی بونیادنانی هەرێمێكی سەقامگیر و بە هێز و یەكگرتوو بەردەوام دەبێت و هەموو دڵسۆزێكی ئەم نیشتمانەش دەبێت پشتیوانی ئەم ستراتیجە و هاوكاری بە ئامانج گەیشتنی ئەم خواستە بێت چونكە ئەوە دواجار خواستێكی گشتییە و پەیوەندی بە مێژوو و بەداهاتووی گەلی كوردستانەوە هەیە.

 

پارتی دیموركراتی كوردستان هەر لە سەرەتاوە بڕیار و نەخشەی خۆی بەڕوونی خستووەتە بەردەم رای گشتی ئەویش پێكهێنانی حكومەتێكی یەكگرتوو لە سەرتاسەری كوردستانە و هەمووان ئەمە دەزانن.

 

سەرۆک بارزانی لە وتاری هەڵمەتی هەڵبژاردنی حیزبەكەی رایگەیاند: یەك حكومەت، یەك هەرێم، یەك هێزی پێشمەرگە، ئامانجمانە و دوای ئەم هەڵبژاردنە هەنگاو بۆ ئەو ستراتیجە دەنێین. زۆر گرنگە ستراتیجی كۆی حیزبەكان لە پرسی پێكهێنانی حكومەتدا روون بێت و هەندێک لەوان ئۆپۆزسیۆن بوونی خۆیان راگەیاندووە.

 

ئێستاش سەرە هاتووەتە سەر جێبەجێكردنی بەڵێنەكانی هەڵبژاردن و خەڵكی كوردستان چاوەڕوانن براوەكانی هەڵبژاردن بە رەچاوكردنی دۆخی هەستیاری ناوچەكە و ئەو هەموو فشار و قەیرانانەی لەسەر خەڵكی هەرێمی كوردستانە، پەلە بكەن لە پێكهێنانی كابینەی نوێ و ئەم كابینەیەش یەك دەنگ و یەك دەست هەوڵی تێپەڕاندنی كێشەكان بدات لەپاڵ ئۆپۆزسیۆنێكی كارای بەرپرسیاردا.

 

ستراتیژی "یەك حكومەت و یەك هەرێم" بۆ ئەوە گرنگە چیدی رای هەرێمی كوردستان لەبەردەم نەیار و دۆستەكان لەدەرەوە و ناوەوەی عێراق پەرت نەبێت ، هەروەها خەڵك بەرچاویان روون بێت كە خاوەنی حكومەتێكن كە بەرپرسیارییەتی دۆخ و قەیرانەكان لەئەستۆ دەگرێت، لەمسەر تا ئەوسەری هەرێمی كوردستان.