ئێمە بەرپرسین لە کردەوەی خۆمان یان سیستمی پەروەردە کردنمان

 

ب ڕاستی سیستەم ڕۆلەکێ مەزن د پێکئینانا کەسایەتیا مرۆڤیدا دگێڕیت، (سیستەمێن سیاسی، جڤاکی، ئابووری، پەروەردەیی و یاسایی) هەمی پێکڤە کەسایەتیا مرۆڤی دئافرینن و شێوازێ ڕەفتارا مرۆڤی دیار دکەن.

 

کەواتە مرۆڤ نە بتنێ بەرهەمێ تایبەتمەندیێن خۆ یێن زاتیە، بەلکۆ بەشەکێ مەزن بەرهەمێ ئەوی سیستەمییە یێ لژێر دهێتە برێڤەبرن.

 

ئەڤا جیاوازیا کەسەکێ ڕۆژئاڤایی و کەسەکێ ڕۆژهەلاتی ژێک جودا دکەت سەبارەت نەریت و ڕەفتار و هشیاری و هزرکرن و مرۆڤایەتیێ بتنێ سیستەمە و نەزێدەتر.

 

تاکێ ڕۆژئاڤایی ب هەمی خوەشگوزەرانی و ناز و نیعمەت و پێشکەفتنا پێشەسازی و تەکنولۆجی و ڕەوشەنبیری تاکەکێ توندەڕە و ڕەگەز پەرست و بەرەلایە، لێ لژێر سیستەمەکێ ڕێکخستی یێ سیاسی و جڤاکی و ئابووری و یاسایی وەک کەسەکێ هشیار و ڕەوشەنبیر و مرۆڤدۆست و میانڕەو ڕەفتارێ دکەت و دهێتە پەروەردەکرن.

 

تاکێن هەر وەلاتەکێ لژێر سیبەرا سیستەمێن سیاسی و جڤاکی و ئابووری و یاسایی دهێنە پەروەردەکرن و هەر تاکەک ڤەڕێژا سیستەمەکێ برێڤەبرن و پەروەردەکرنا وەلاتێ خوەیە.

 

ئەم وەک تاکێن ڕۆژهەلاتی ئەڤێن ئەم ب چاڤەکێ کێم دهێنە دیتن دسەریدا کەسێن پاقژ و مرۆڤدۆست و میانڕەون، لێ لژێر سیستەمێن فاشلێن سیاسی جڤاکی و ئابووری و یاسایی و لژێر گۆشارێن جەنگ و شەران هاتینە پەروەردەکرن.

سەرەرای مرۆڤدوستی و مرۆڤپەروەریا مە یا تاکەکەسی، بۆ هیچ جارەکێ ئەم لژێرهیچ سیستەمەکێ پەروەردەیی یێ گۆنجایی نەهاتینە برێڤەبرن.

 

ئەڤ ڕەفتارا ژ مە دهێتە دیتن نە کەسایەتیا مەیا ڕەسەنە و دینەموویێ ڤێ ڕەفتارێ سیستەمە، زێدەباری ئەڤێ هەمیێ ئەم بخوە ژی بەرپرسن ژ بەشەک ڕەفتارێن خوە لێ بەرپرسێ سەرەکی سیستەمە.