ڕەش !! ئاڵایەکی ڕەش .. ڕۆژانێکی ڕەش.. ژنانی ڕەشپۆش

شنگال و گوندەواری شنگال، ئەو  شارەی کە بە بانگەشەی دەوڵەتی ئیسلامی ، بە بەرچاوی تەواوی مرۆڤایەتییەوە، هەتککراو سەدان هەزار کوردی ئێزدیی ئاوارەو سەرگەردان کران. هەزارانیان کوشتوبڕ و هەزارانیان وەک سەبایا ڕاپێچی بازاڕەکانی نخاسەی دەوڵەتی ئیسلامی کران. شار و کەلتوور و ئایینێکی هەزاران ساڵەی ڕەسەنی کوردستان لە غافڵگیری و لە ئەنجامی خیانەتی بەشێک لە هۆزە بەدەوییەکانی ناوچەکە، کەوتە ژێر دەستی سەدان چەکداری داعشی دڕندەی نێودەوڵەتی و  تاڵان و وێران کرا. لەو ڕۆژە ڕەشەدا بەتەنیا ئێزدییەکان نەبوون کە بوونە قوربانیی توندڕەوی و دڵڕەقییەکی کەم وێنە ، بەڵکو کەرامەتی سەرجەم مرۆڤایەتی و کرۆکی پێکەوە ژیان و ژیاندۆستی و خودی ئایینی ئیسلامی میانڕەوو خوداناسییش، زەبری زۆر توندو ئازاربەخشیان پێکەوت.

ئەو ڕۆژەی کە شنگال و پێشتریش کە شاری مووسڵ و دەوروبەری کەوتنە ژێر دەست و پێڵاوی خوێناویی داعش، متمانە بە دەوڵەتی عێراقیش کەوتە بەرپێلەقەو بوو بە خەبار کانە. لە ماوەی چەند کاتژمێرێکدا، کە هێشتا جیهانی دیموکراسی و عەرەبی و ئیسلامی لە شیرینخەوی بێ ئاگاییدا بوون، چیای شنگال بوو بە پەناگەی دەیان هەزار ژن و منداڵ و پیر و گەنجی هەڵاتووی بێ چارەی چنگی تیرۆرستانی داعش و شارو گوندەکانیشیان بوونە گۆڕەپانی سەدان تاوانی پاکتاوی ئایینی و نەتەوەیی.

ئەمڕۆ، کە یازدەهەمین ساڵڕۆژی ئەم کارەساتە یاد دەکەینەوە، ئەو پرسیارانە دووبارەو سەد بارە دەکەینەوە کە هێشتا ویژدانی مرۆڤیاتەییان نەهەژاندووە :  (بأي ذنب قتلت) ؟ بە چ تاوانێک هەزاران مرۆڤی بێ گوناه و ڕازی بە ژیانێکی سادە ، بەو دڕندەییە کوژران؟ کێ ژیان  و تەمەنی بەهەدەرچووی کوردانی ئێزدی قەرەبوو دەکاتەوە ؟ 11 ساڵ هەرەسی تەندرووستی و نائومێدی و ئازاری چاوەڕوانی و مەینەتیی ئاوارەیی دەیان هەزار کوردی ئێزدی لە گەردنی کام دەوڵەت و کام سپۆنسەری تیرۆری جیهانی و ئیقلیمیدایە ؟ کێ دایکانی ڕفێنراو و کچانی لە بازاڕی نخاسە فرۆشراو و منداڵێتیی شێوێندراوی ژێر ئاڵای ڕەشی داعش دەگەڕێنێتەوە ؟

ئەو ئەقڵیەت و بیرو باوەڕە شۆڤینی و توندڕەوە ئایینییەی ئێمەی گەیاند بەم کارەساتە هێشتا زیندووە و خۆی مەڵاس داوە و چاوەڕێی دەرفەتێکە لە کەلێن و درزێکی نێوانمانەوە لە جاران دڕندانەتر  پەلاماری ژن و ژیان و ئازادیمان بداتەوە . ساڵانێکە لەدوای ئازادکردنی شنگال و هەرەسپێهێنانی دەوڵەتی (ڕەش ئاڵاکان) لە بریی ڕێککەوتن و پاراستن و ئاوەدانکردنەوەی شارەکە، ناکۆکییەکی بێ تام و بێ مۆڕاڵ لە نێوان هێزە هەرێمی و ناوخۆییەکاندا لەسەر دەستەڵات، چارەنووسی شنگالی بە نادیاری هێشتۆتەوە و درێژەی داوە بە ئاوارەیی و سەرگەردانیی هەزاران خێزانی کوردی ئێزیدی ، وەک بڵێی ئازارو مەینەتیی 11 ساڵیان بەس نەبووبێت، ئازاری پەراوێزخستن و  شەڕی نفوزیشی هاتۆتە بان .

شنگال پێویستی بە کۆنگرەو کۆڕ و سیمپۆزیۆمی ناو هۆتێلی 5 ئەستێرە نییە ! پێویستی بە بەیاننامەی سەرکۆنەو ناڕەزایی ساڵانە نییە. شنگال و ئێزدییان پێویستیان بە پڕۆژەیەکی نیشتیمانیی-کوردیی –نێودەوڵەتییە، کە ژن و ژیان و ئازادی و ئاوەدانییان بۆ بگێڕێتەوە ! پێویستیان بە دادپەروەرییە، کە قەرەبووی دوو جار تاڵان کردنیان بۆ بکاتەوە : جارێک بە شمشێرو ئاڵای ڕەشەوە، جارێکیش بە پەراوێزخستن و خۆ کەڕکردن لە ئاست هاوارو ئازارەکانیان!

یازدە ساڵ تێپەڕی، بەڵام هێشتا برینەکانی جەستەی شنگال و کوردانی ئێزدی خوێنیان لێ دەچکێ! (شنگال) زامی قووڵی ناخی هەموو کوردێک و کەرامەتی هەموومانە، پێوەری ئەخلاقیمانە،  ناوەڕۆکی مرۆڤایەتیمانە.

نەمریی بۆ شەهیدان، ئازادی بۆ ڕفێندراوان،  بوژانەوە و ئارامییش بۆ شنگال.