کارەبای 24 کاتژمێری و مەترسییەکی زۆر گەورە !

چەند ڕۆژێکە  ڤیدیۆیەک لە (سۆشیال میدیا)ـی بێ ئیتکەوە، فەزای بێ خاوەنی میدیای ئازادی کوردیی تەنیوە، تێیدا "مایک بە دەستێک"ـی خۆشباوەڕ، کابرایەکی لە خۆی نەزانتر دەدوێنێ و بەهەردووکیان دەڵێی هەنگیان لە کلۆرەداردا دۆزیوەتەوە و پێکەوە بە پەرۆشییەوە باسی "گرانی و تێچووی خەیاڵیی" کارەبای گڵۆپە سوورەکەی سەر سویچ پلاک و شاحینەی مۆبایل لە پرۆژەی کارەبای 24 کاتژمێریدا دەکەن. بەوەش، بە کاڵفامیی خۆیان کۆی پرۆژەی ڕووناکی دەخەنە ژێر پرسیار و گومانەوە و دڵی خەڵکی کوردستانی لێ کرمێدەکەن! بەجۆرێ حیساباتێک و لێکدان و دابەشکردنێکی بازاڕیی و نازانستیی وەها دەکەن کە ئیتر لەمەودوا دەبێ بترسین و بەشێک لە داهاتی مانگانەمان بۆ خەرجیی گڵۆپە سوورەکانی سەر سویچ پلاک و چارجەری مۆبایلەکانمان لابدەین!!  

هەرچەندە من ساڵانێکە نائومێد بووم  لەوەی ( سۆشیال میدیا)ـی کوردی خۆی ڕاستبکاتەوە، بەڵام بۆ ئەوەی ڕاستییەکان گورگانخوارد نەکرێن، فەرموون بزانن ڕاستیی و درووستیی ئەو خەرجییە قورسە چییە و  چۆن حیساب دەکرێت: 

1. یەک دانە گڵۆپی سووری سەر سویچ پلاک، لە کاتژمێرێکدا تەنها ( سفر و لە دەهەزاردا، یەک ) =  0.0001  کیلۆوات کارەبای پێویستە. لە 24 کاتژمێردا ( سفر و لە دەهەزاردا 24 ) = 0.0024 کیلۆوات کارەبای سەرف دەکات. ئەگەر بۆ هەر کیلۆواتێک 72 دینار هەژمار بکەین، لە ڕۆژێکدا دەکاتە  0.17 دینار و لە مانگێکدا دەکاتە 5.2  دینار.

 
واتە ئەگەر لە ماڵێکدا 20 سویچ پلاکی گڵۆپدار 24 کاتژمێر کار بکەن، تێچووەکەیان  بۆ یەک مانگی تەواو تەنها  104 دینارە. ( هەی سەدوچوار جار لەقوڕت نێم، سۆشیال میدیای نەزان و درۆزن !)

 
2. هەر شاحینەیەکی مۆبایل لە یەک کاتژمێردا 0.02 کیلۆوات کارەبا دەبات، لە 12 کاتژمێردا دەکاتە 0.24 کیلۆوات، کە تێچووەکەی ( ئەگەر ڕۆژانە  12 کاتژمێر کار بکات ) دەکاتە 17 دینار، کە لە مانگێکی تەواویشدا بۆ هەر دانەیەک دەکاتە پێنجسەد و هەژدە دینار =  518 دینار.  کەواتە: ئەگەر لە ماڵێکدا 6 چارجەر( شاحینەی مۆبایل) ڕۆژانە  12 کاتژمێر  کارەبا ڕاکێشن، تێچووی سەرجەمیان لە مانگێکدا تەنها: سێ هەزار و سەد و دە دینار   3110 دینارە. ( هەی سێ هەزار جار لەوە ڕسواتر بیت سۆشیال میدیای چەواشەکار ) !!

کەواتە کۆی ئەو "مەترسییە گەورەیەی" بەهۆی (کارەبای 24 کاتژمێری و پرۆژەی ڕووناکییەوە) ڕووبەڕووی داهاتی مانگانەی خەڵکی کوردستان دەبێتەوە: بریتییە لە 3110 دینار+ 104 دینار = 3214 سێ هەزار و دووسەد و چواردە دینار  کە دەکاتە نزیکەی 2 دۆلار و نیو !!

 
بەڕاستی زوڵمێکی زۆر گەورەیە و لێخۆشبوونی نیە.. هەقی وایە  بەهۆی ئەم سێ هەزار دینارەوە لە دادگای فیدڕالێ سکاڵا لەسەر حکوومەتی هەرێم تۆمار بکرێ، بەڵکو  بە هاوپەیمانیی چەند لایەنێک لە هەڵبژاردنی داهاتوودا (یەک تەپڵەک و پێچکە کورسییەک) لە پەرلەمانی عێراق بەدەست بهێنن!