حکومەتا هەرێما کوردستانێ ب چەکێ نەرم چ بەرامبەر ئیرانێ کر؟

ئارمانجگرتنا مالا دووەم سەرمایەدارێ ھەرێما کوردستانێ ژلایێ حکومەتا ئیرانێ ڤە و ھێرشا وێ یا ترسنۆک و بێ بەھا و بەھانە ل سەر ھەولێرا پایتەخت، ئەو باژێرێ دھێتە ھژمارتن ئارامترین باژێر ل سەر ئاستێ ھەموو عیراقێ و گەلەک وەلاتێن دەوروبەر ژی، پەیامەکا روون و ئاشکرا بوو کو رژێما ئیرانێ ژبلی چاڤ پێنەڕابوون ب سەربوورا سەرکەفتی و پێشڤەچوونا ھەرێمێ و ب تایبەت ھەولێرا پایتەخت چ دی ناگەھینیت، زێدەباری ملکەچنەبوونا ھەولێرێ بۆ ئەجێندا و بەرنامێ ئیرانی ل دەڤەرێ.

 بەرسڤادانا حکومەتا ھەرێما کوردستانێ بۆ حکومەت و لەشکرێ ئیرانێ ب چەکێ ھێزا نەرم (Soft Power) شیا وی وەلاتی شەرمزار بکەت ل سەر سێ ئاستان.

•ل سەر ئاستێ ناڤخۆ: ئەوا ئیرانێ ڤیایی بۆ گەلێ خۆ دیار بکەت کو ئیران وەلاتەکێ بھێزە ل دەڤەرێ و شیانێن لەشکری و سەربازی یێن باش ھەنە و ھێرش و گڤاشتنێن ل سەر وان بێ بەرسڤ نابن، لێ گەلێ ئیرانی دزانیت کینە ئەو ئابلۆقە و دورپێچکرین و مەزنە سەرکردە و بەرپرسێن وان دکوژن، باش دزانن و ب دیارکری (ئەمریکا و ھەڤپەیمانێن وێ و ئیسرائیل)ن، لێ ئیرانێ تولڤەکرنا خۆ کرە ئارمانجگرتنا خێزانەکا سڤیل یا بێگونەهـ ل ناڤەندا ھەولێرا پایتەختێ کوردستانێ، د ئەنجامدا کەسێن سڤیل و زارۆک ھاتنە شەھیدکرن، ھوسا حکومەتا ئیرانێ کەتە کەتوارەکێ نەخۆش و شەرمن دگەل مللەتێ خۆ و بازرگان و سەرمایەدار و کۆمپانی و بازرگانێن ل گەل ھەرێمێ کاردکەن و ل سەر ئاستێ ناڤخۆ ژی شەرمزار و فھێت بوو دگەل وەلاتیێن خۆ.

 

•ل سەر ئاستێ عیراقێ: بۆ جارا ئێکێ تا رادەیەکێ مەزن رەنگڤەدانەکا بھێز یا شەرمزارکرنێ ل دژی وێ دەستدرێژیێ ھەبوو، چ ل ژلایێ وەلاتیان بیت یان پارت و لایەنێن سیاسی و بازرگان و سەرمایەدار و حکومەتێ بیت، ھەتا رەوش گەھشتیە وی ئاستی سەرۆک وەزیرێن عیراقێ هزر د تۆمارکرنا سکالایەکێ دا بکەن ل جڤاتا ئاساییشا نێڤدەولەتی و دبیتە ئێکەم جار ھەلویستەکێ ھوسا جدی ژ حکومەتا فیدرال دەرکەڤیت کو یێ ھەڤڕا بیت دگەل حکومەتا ھەرێما کوردستانێ.

 

•ل سەر ئاستێ نێڤدەولەتی: زێدەباری گۆشەگیرکرنا ئیرانێ ژلایێ وەلاتێن پێشکەفتی و رۆژئاڤا ڤە ب سەپاندنا دۆرپێچێن ئابووری، لێ ل گەل دەستدرێژیا ئیرانێ بۆ سەر سەروەریا ئاخا عیراقێ و ب تایبەت ھەرێما کوردستانێ زێدەتر بەرپرس و کەسێن وێ یێن سیاسی و لەشکری ھاتنە سزادان و ئێدی مەزنە دەستھەلاتدارێن وەلاتێن پێشکەفتی ئامادەنەبوون ل گەل بەرپرسێن ئیرانی روونن و جڤینان دگەل بکەن بۆ نموونە ل کوربەندێ ئابووری یێ داڤوس ل سویسرا، پێگەهـ و رۆلێ وان د ترازیێن سیاسی و دیپلۆماسی یێن نێڤدەولتی دا ھاتە خوار، نەخاسمە ژی ل گەل وێ ھێرشا ترسنۆک بەرێز مەسرۆر بارزانی، سەرۆکێ حکومەتا ھەرێما کوردستانێ یێ پشکداربوو ل کوربەندێ ئابووری یێ داڤوس و دەرفەتەکا زێرین بوو، چاڤ ب دەھان مەزنە بەرپرسێن وەلاتێن بیانی بکەڤیت ژ سەرۆک، سەرۆک وەزیر، وەزیر و کەسێن بالا دەست د وەلاتێن خۆدا.

 

ب ڤێ چەندێ ژی تا رادەیەکێ مەزن دیپلۆماسیەت و سیاسەتا حکومەتا ھەرێما کوردستانێ و بەرسڤدانا وێ ب دیپلۆماسیەت و چەکێ نەرم بەرامبەر دەست درێژیێن ل سەر ھەرێمێ کاریگەریێن ئەرێنی و بھێز ھەبوون کو ئیران زێدەتر سنورێن خوە نە بەزینیت، و گرێدانا خەلک و حکومەتا ھەرێمێ ب دۆز و ئاخا ئەوانڤە پتر موکم بوو.

د. کاوە عەبدولعەزیز، مامۆستا ل زانکۆیا دھۆک