شەرەکێ  شانۆگەریانەیە

 

شەرێ ئۆكراینا و پاشان غەزە و دەرهاڤێژێن وێ و پێشتر ژی شەرێ داعش کو هەتا نوكە ژی بەردەوامە، رەنگڤەدانێن خۆ هەنە.

ب دیتنا من چ شەرێن جددی و بەرفرەهـ ل دەڤەرێ دروستنابن و لایەنێن سەرەكی د بنیات دا ل سەر ئەردێ خۆ شەری ناكەن، بەلكۆ شەری ل سەر ئەردێ وەلاتێن دی دکەن، بۆ مە كوردان ژی دێ پتر دەلیڤە هەبن پێشڤەبچین بەلێ دڤێت مە یەک ستڕاتیژ هەبیت، راستی جهێ پرسیارێ یە ئەرێ ئەڤان وەلاتانا چ سەروەری مایەڤە؟(عیراق،سوریا، یەمەن، لوبنان) درۆنێن ڤان لایەن و وەلاتان  شانۆیەكا سیاسی و سەربازی یە. 

شەرەكێ سارد  و ب وەكالەت دهێتە كرن و مللەتێن دەڤەرێ ژی نەچارن خۆ دگەل ڤێ شانۆگەریێ بگۆنجینن و جار تەماشەڤانن و جار ژی ئەكتەرێن لاوەکی  نە.

شەرێ مەزن، شەرێ ئابۆری یە و شەرێ سیاسی یێ ناڤخۆیی یێ وەلاتێن زلهێزە (کاریگەریا هەلبژاردنان وەك نموونە) و ئەو لەشكركێشی یێن ل دەڤەرێ هەین ل عیراقێ و سوریا ب تایبەت دێ مینن وەك خۆ و مۆدێلێ ئەڤغانستانێ ل سوریێ و عیراقێ ناهێتە پەیرەوكرن، چونكە دوو ئەزموونێن ژێكجوودانە.

دەولەتێن دەڤەرێ ژی دێ وەك خۆ مینن و چ گۆهرین تێدا ناهێنە كرن، چونكە د بنیات دا هاوكێشە ئەوە ئەو وەلاتێن هەنێ بمینن ئالۆز و نیمچە ئارام.

من باوەریەكا تەمام هەیە كۆ وەلاتێن زلهێز و دەوروبەر بەرژەوەندیێن هەڤپشك هەنە و هەر لایەك رازی یە ب ڤێ دابەشكرنا نوكە هەی.

شەرێ سەرەكی هەتا نۆكە ژی شەرێ ئۆكراینایە و دێ یێ بەردەوام بیت بۆ دەمەكێ نەدیار.

بەلێ بتنێ دڤێت چاڤەرێ بكەین دێ ئەنجامێن هەلبژارتنێن سەرۆكاتیا ئەمریكا چ بن و دبیت ترامپ دەر بچیت و پرۆژێ خۆ یێ سیاسەتا دەرڤە پێشڤەببەت و شانۆگەریا نۆكە ژی یا ل دەڤەرێ دێ یا بەردەوام بیت دگەل هەندەک دەستکاریێ. 

 بشار کیکی، ئەندامێ بەرێ یێ پەڕلەمانێ عیراقێ و سەرۆکێ بەرێ یێ ئەنجوومەنێ پارێزگەها نەینەوا.