هەولێر خۆی بۆ پێشوازیکردن لە زیارەتکارانی ئیمامی حوسێن ئامادە دەکات

ئاڤا نیوز

 

هەموو ئامادەکارییەکان بۆ پێشوازی لە زیارەتکارانی ئێرانی بۆ چلەی ئیمامی حوسێن کراون و چاوەڕوان دەکرێت ژمارەی زیارەتکاران بەراورد بە پارساڵ زیاتربێت.

 

وێنە گەورەکە: ساڵانە لە نەجەف و کەربەلا چلەی ماتەمینی بۆ ئیمام حوسێن بەڕێوەدەچێت،  شیعەکانی جیهان و بەتایبەت ئێران بۆ بەشداریکردن لەم ڕێوڕەسمەدا سەردانی عێراق دەکەن.

 

لێدوانی فەرمی: ئومێد خۆشناو، پارێزگاری هەولێر بە ئاڤا نیوزی ڕاگەیاند، زیارەتکارانی ئێرانی بە دەروازەی نێودەوڵەتی حاجی ئۆمەراندا دێنە ناو هەرێمی کوردستان، دواتر بە شاری هەولێردا بەرەو نەجەف و کەربەلا بەڕێدەکەون، ئێمەش هەموو ئامادەکارییەکانمان بۆ پێشوازیکردنیان تەواوکردووە.

 

لەلایەکی دیکەوە: نازم دەباغ، نوێنەری حکومەتی هەرێمی کوردستان لە تاران، بە ئاڤا نیوزی گوت: نووسینگەیەک لە پارێزگاکانی ئێران دانراوە، پاسەپۆرتی 15 ڕۆژی بە 150 هەزار تمەن بەو کەسانی ئەفغانی و عێراقی دەدات کە بێ پاسەپۆرتن تا بتوانن سەردانەکە بکەن، بە سێ شێواز زیارەتکاران دێنە نێو عێراق، ئەوانەی بەپێ دێن ئێستا بەڕێکەوتوون، بەشێک بە ئۆتۆمبێل و بەشەکەی دیکەش بە فڕۆکە سەردانی عێراق دەکەن.

 

زنیاری زیاتر: چاوەڕوان دەکرێت ئەمساڵ زیاتر لە 500 هەزار زیارەتکاری ئێرانی بێنە هەولێر و دواتر بچنە نەجەف و کەربەلا.

ئه‌مه‌ش بزانه‌: شیعەکان 20ـی مانگی سه‌فه‌ر دەکاتە 25ی ئاب، یادی چله‌ی ماته‌مینی ئیمام حوسێن دەکەنەوە.