شاندی هەرێمی كوردستان لە ئەمریكا چەند پرسێك تاوتوێ دەكات

ئاڤا دیجیتاڵ

شاندی سه‌رۆكایه‌تی هەرێمی کوردستان پێنج ڕۆژە لەئەمریكایە، لە درێژەی سەردانەكەیدا لەگەڵ بەرپرسانی ئەمریکا كۆبووه‌وه‌، چەندین پرسی تایبەت بە هەرێمی كوردستانیان تاوتوێكرد.

وێنە گەورەکە: له‌ به‌رده‌وامیی سه‌ردانه‌كه‌یاندا بۆ ئه‌مریكا، شاندی سه‌رۆكایه‌تیی هه‌رێمی كوردستان چه‌ند كۆبوونه‌وه‌یه‌كی به‌رفراوانیان له‌گه‌ڵ به‌رپرسانی باڵای ئه‌مریكی له‌ كۆشكی سپی و وه‌زاره‌تی ده‌ره‌وه‌ و وه‌زاره‌تی به‌رگری "پێنتاگۆن" ئەنجامدا.

بابەتە ستراتیژییەكان: ‎له‌ كۆبوونه‌وه‌كاندا "پرسی وزه‌ و گرنگیی هه‌نارده‌كردنه‌وه‌ی نه‌وتی هه‌رێمی كوردستان، هەڵبژاردنی داهاتووی پەرلەمانی کوردستان، پەیوەندییەکانی هەولێر و بەغدا، دۆخی پێکهاتەکان و ئاوارەکان، ئازادیی ڕادەربڕین و مافه‌كانی مرۆڤ، جێبەجێکردنی ڕێککەوتننامەی شه‌نگال، پرۆسه‌ی چاكسازی له‌ وه‌زاره‌تی پێشمه‌رگه‌ی حكوومه‌تی هه‌رێمی كوردستان و یه‌كخستنه‌وه‌ی پێشمه‌رگه‌، دوایین پێشهاته‌كانی دۆخی ئاڵۆزی ڕۆژهه‌ڵاتی ناوه‌ڕاست و شه‌ڕ له‌ غه‌زه‌ و ئه‌گه‌ر و لێكه‌وته‌كانی" خرانه‌ به‌ر باس و گفتوگۆیان له‌باره‌وه‌ كرا.

ڕاگەیێنراوی فەرمی: سەرۆكایەتی هەرێمی كوردستان ڕایگەیاند: ‎كۆبوونه‌وه‌كان له‌گه‌ڵ هه‌ر یه‌ك له‌ ئامۆس هۆکستا‌ین، گه‌وره‌ ڕاوێژكاری جۆ بایدن بۆ كاروباری وزه‌ و وه‌به‌رهێنان له‌ كۆشكی سپی، ئه‌زرا زیا، بریكاری وه‌زیری ده‌ره‌وه‌ بۆ ئاسایشی سیڤیل، دیموكراسی و مافه‌كانی مرۆڤ، دانیێل شاپیرۆ جێگری یاریده‌ده‌ری وه‌زیری بەرگری بۆ كاروباری ڕۆژهه‌ڵاتی ناوه‌ڕاست و ڤیکتۆریا تایلۆر، جێگری یاریدەدەری وەزیری دەرەوە بۆ کاروباری ڕۆژهەڵاتی نزیک، به‌ڕێوه‌ چوون.