ئاسایش دەستگیرکردنی گرووپێکی سەر بە داعشی لە سلێمانی و هەڵەبجە ڕاگەیاند

ئاڤا  نیوز  

بەڕێوەبەرایەتیی ئۆپەراسیۆنەکانی ئاسایش دەستگیرکردنی گرووپێکی سەر بە داعشی ڕاگەیاند، "پیلانیان داناوە بۆ ئەنجامدانی چەندین کردەوەی  تیرۆریستی و تیرۆرکردنی چەند فەرماندە و ئەفسەرێکی باڵای هێزە ئەمنییەکان".

ڕاگەیێنراوی فەرمی: بەڕێوەبەرایەتیی گشتیی ئۆپەراسیۆنەکانی ئاسایش ڕایگەیاند: "لەسەر بنەمای زانیاریی هەواڵگری، لە پلانێکی تۆکمەدا لە ڕۆژانی 3-7-2024 و دواتر بە هاوکاری بەڕێوەبەرایەتیی ئاسایشی شارەزوور لە پارێزگاکانی هەڵەبجە و سلێمانی (گرتووخانەی چاکسازی گەورانی سلێمانی)، گەرمیان، چەمچەماڵ، 11 تیرۆریست دەستگیرکران".

زانیاریی زیاتر: "تیرۆریستەکان پێکهاتبوون لە هەر سێ ئەمیری گرووپ و تاقمەکان "دیاری سەعدی - ئەمیری مەیدانی هەڵەبجە و شارەزوور" ، "ئیکرام خالید ناسراو بە حاجی ئیکرام – ئەمیر و سەرپەرشتیاری ناردنەدەرەوەی تیرۆریستان" ، "شێرکۆ عەبدوڵڵا - ئەمیری ئەمنی و  هەشت تیرۆریستی دیکە".

ئەوەی پێویستە بیزانیت: بە گوتەی ئاسایش "پاش لێکۆڵینەوەی ورد دانیان بە تاوانەکانیاندا ناوە،  پیلانیان دانابوو ژمارەیەک فەرماندە و ئەفسەری باڵای ئەمنی و ئیداری تیرۆر بکەن و چەندین کردەوەی دیکەی تیرۆریستی لە شارەکانی هەرێم ئەنجام بدەن".

ئەمەش بزانە: پاش بەدواداچوونی زیاتر ڕوونبووەوە، "تیرۆریستێکی هەڵاتوو لە بەریتانیا بە ناوی بیلال مەحموود ناسراو بە (یاخی) پەیوەندی بە گرووپەکەوە هەبووە و ئاڕاستەی کردوون بۆ بڵاوکردنەوەی فکری (دەوڵەتی بەناو ئیسلامی) و تووندڕەوی و تیرۆر".

 

ڤیدیۆی دانپێدانانی ژمارەیەک لە دەستگیرکراوەکان ببینە