ئەمساڵ لە چین ساڵی ئەژدیهایە

ئاڤا نیوز

بەگوێرەی ڕۆژژمێری چینی، ساڵی نوێی چینی دەستی پێ کردووە، ئەمساڵیش ساڵی ئەژدیهایە. 

ئەوەی پێویستە بیزانیت: لە چین هەر ساڵێک بە ناوی ئاژەڵێکەوە ناودەنرێت، لە چین، ئەژدیها هێمایە بۆ هێز، دەسەڵات، خۆشبەختی، ژیری، سەرکەوتن، ئاسایش. هەر بۆیە لە کۆنەوە سیمبولی ئەژدیها لەسەر ئاڵاکانی ئیمپراتۆریەتی چینی هەبووە. 

ئەمەش بزانە: بەگشتی 12 جۆر ئاژەڵ دیاریکراون و هەر 12 ساڵ جارێک دووبارە دەبنەوە. 12 ئاژەڵەکە بریتن لە: مشک، گا، پڵینگ، کەروێشک، ئەژدیها، مار، ئەسپ، بزن، مەیمون، کەڵەشێر، سەگ و بەراز. بەگوێرەی ئەفسانە چینییەکان، لەناو هەموو ئاژەڵەکاندا، ئەژدیها لە هەموویان زیاتر خۆشبەختی دێنێت.