دژەتیرۆری کوردستان: نابێت دامەزراوە ئەمنییەکان بۆ کوشتوبڕی خەڵک و بڵاوکردنەوەی ترس بەکاربێن

ئاڤا نیوز

 

دژە تیرۆری كوردستان لە ڕاگەیێەنراوێكدا دەڵێت، ئەو ڕووداوە نەخوازراوانەی لە سلێمانی ڕوودەدەن، مایەی نیگەرانی و جێگەی هەڵوێستە لەسەر كردنن.

 

ڕاگەیێنراوی فەرمی: دژەتیرۆری كوردستان بە بەیاننامەیەكدا نوسیویەتی:”ئەو ڕووداوە نەخوازراوانەی ماوەیەکە لە شاری سلێمانی و دەوروبەری ڕوو دەدەن مایەی نیگەرانی و جێی هەڵوەستە لەسەر کردنن، بەداخەوە ڕووداوەکان ڕۆژانە لەژێر ناوی دەزگا سەربازی و ئەمنییەکاندا ئەنجام دەدرێن کە تێیاندا هاونیشتمانییان دوور لە پرەنسیپی یاسایی دەستگیر دەکرێن، دەڕفێندرێن، ئازار دەدرێن و دەکوژرێن.

 

زانیاریی زیاتر: لە بەشێكی دیكەی بەیاننامەكەدا هاتووە: ئەم کردەوانە، ناو و گەورەیی دەزگا سەربازی و ئەمنییەکان کە ئەرکی سەرەکییان پاراستنی سەروماڵی ھاووڵاتییانی خۆشەویستی کوردستانە، دەخاتە ژێر پرسیار و لەکەداریان دەکات و ترس و دڵەڕاوکێ و تۆقاندن بڵاو دەکەنەوە.

 

لەلایەكی ترەوە: هەر لە بەیاننامەكەداهاتووە:” ئەرکی دامەزراوە سەربازی و و ئەمنییەکان، پاراستنی ئاسایش و سەروماڵی هاووڵاتییانە، نەک بەکارھێنانیان لە ململانێیە سیاسییەکان بۆ کوشتوبڕی خەڵکی سڤیل و بڵاوکردنەوەی ترس و تۆقاندن کە لەگەڵ پرەنسیپی هێزە سەربازی و ئەمنییەکان ناگونجێت.

 

ئەمەش بزانە: دژە تیررۆری كوردستان لە كۆتایی بەیاننامەكەیدا نوسیویەتی:”لێرەوە دووپاتی دەکەینەوە، نابێت و ناکرێت دەزگا سەربازی و ئەمنییەکان تێکەڵ بە ململانێی کەسی و سیاسی و حیزبی بکرێن و لە بەرژەوەندیی تایبەت و تاکلایەنە بەکار بهێندرێن”