سوودانی و بەرپرسانی ئەمنی دوایین پێشهاتەکانی ناوچەکە تاوتوێ دەکەن

ئاڤا نیوز

 

سەرۆکوەزیرانی عێراق  بە ئامادەبوونی بەرپرسانی ئەمنی و سەربازی سەرۆکایەتی کۆبوونەوەیەکی ئەمنی کرد و دوایین پێشهاتەکانی ناوچەکەیان تاوتوێ کرد.

 

وێنە گەورەکە: محەممەد شیاع سوودانی فەرماندەی هێزە چەکدارەکان و سەرۆکوەزیرانی عێراق لەگەڵ بەرپرسانی ئەمنی و سەربازی دوایین پێشهات و ڕووداوەکانی ئەم دواییانەی عێراق  و ناوچەکەیان تاوتوێ کرد.

 

ڕاگەیێنراوی فەرمی: بە گوێرەی نووسینەگەی سەرۆکوەزیرانی عێراق، سەرجەم پێشهاتەکانی عێراق و ناوچەکە و کاردانەوەی چاوەڕوانکراوەکان کە لە چەند کاتژمێری ڕابردوودا ڕوویان دا تاوتوێ کران.

 

زانیاریی زیاتر: سەرۆکوەزیران کۆمەڵە ڕێنمایی و ڕاسپاردەی بۆ لایەنە ئەمنی و سەربازییەکان دەرکرد.

 

ئەوەی پێویستە بیزانیت: لە ماوەی کەمتر لە 24 کاتژمێری ڕابردوودا، ئیسماعیل هەنیە، سەرۆکی مەکتەبی سیاسیی بزووتنەوەی حەماس کوژرا و لە بۆردوومانێکی هاوپەیمانی نێودەوڵەتی بە سەرۆکایەتیی ئەمریکا چوار سەربازی حەشدی شەعبی لە پارێزگای بابل لە عێراق کوژران .