"مەترسیی کورد و سوننە لە کشانەوەی هێزەکانی ئەمریکا ڕەوایە"

ئاڤا نیوز

ڕۆژی شەممە پەرلەمانی عێراق بۆ گفتوگۆکردن لەبارەی کشانەوەی هێزەکانی ئەمریکا کۆبووەوە، بەڵام زۆرینەی لایەنە کوردی و سوننییەکان بایکۆتیان کرد، بە پاساوی ئەوەی ترسیان لە کشانەوەی هێزەکانی ئەمریکا هەیە.

چی ڕوودەدات: پەرلەمانتارانی شیعە نیگەران بوون لەو هەڵوێستەی پەرلەمانتارانی کورد و سوننە، لۆبییەکیان پێکهێنا و هەڕەشەی وەرگرتنی هەڵوێست و تۆڵەکردنەوە دەکەن.

هەڵوێستی شیعەکان: عەلا حەیدەری، پەرلەمانتاری سەربەخۆی شیعە دەڵێت: بەشداری هیچ کۆبوونەوەیەکی پەرلەمان بۆ هەڵبژاردنی سەرۆکی پەرلەمان ناکەن کە پشکی سوننەیە. هەروەها شکست بە هەر کۆبوونەوەیەکیش دەهێنن کە باسی بودجەی تێدا بکرێت و دەنگ بە هیچ بەشە بودجەیەک نادەن بۆ هەرێمی کوردستان ڕەوانە بکرێت.

بۆچوونی بەرامبەر: شێروان دوو بەردانی، ئەندامی پەرلەمانی عێراق لە فراکسیۆنی پارتی دیموکراتی کوردستان دەڵێت: کورد و زۆرینەی لایەنە سوننییەکان مەترسی ڕاستەقینەیان هەیە لە کشانەوەی هێزەکانی ئەمریکا.

چی لەبارەوە دەگوترێت: د. عەقیل عەباس، شرۆڤەکار لە واشنتن بە ئاڤا نیوزی ڕاگەیاند، مەترسیی کورد و سوننە لە کشانەوەی هێزەکانی ئەمریکا ڕەوایە، چونکە ماوەکانی ڕابردوو شاهێدی ئەوە دەدەن حکومەتی ناوەندی چۆن مامەڵەی لەگەڵ هەرێمی کوردستان کردووە.

بەگوتەی د. عەقیل، ئەو کاتەی کە نووری مالیکی سەرۆکوەزیران بوو چۆن هەڕەشەی لە هەرێمی کوردستان دەکرد، بەنیسبەت سوننەکانیشەوە دۆخەکە ڕوونە چۆنە گرووپە شیعە چەکدارەکان چییان بە شارە سوننەکان کردووە.

هاوکات مەشعان جبووری، کە یەکێکە لە سیاسییە دیارەکانی سوننە لە عێراق دەڵێت، مانەوەی هێزەکانی ئەمریکا لە عێراق هەستی پارێزراوبوون دەدات بە کورد و سوننە، لەکاتێکدا هاوسەنگی لە دەسەڵات لە عێراق نەماوە، لایەنە شیعەکان پێناسی تاکە لایەنێکیان سەپاندووە بەسەر دەوڵەتدا و کەمتەرخەمی دەکەن لە پێکهێنانی هەندێک دامەزراوەی ناوەندیدا کە دەستوور بڕیاری لەسەر داوە.