لە پارێزگایەکی باشووری عێراق باران "شکستی" چەندین پڕۆژە دەردەخات

ئاڤا نیوز

پارێزگاری شاری موسەننا لە باشووری عێراق بەهۆکاری ئەوەی بە بەهای ملیاران دینار پڕۆژەی خزمەتگوزاریی بەم بارانە تێکچوون و خۆیان بۆ بارانێک نەگرتووە، بڕیاریدا چەندین بەڵێندەر و کۆمپانیا بدرێنە دادگا چونکە پڕۆژەکانیان شکستیان هێناوە.

وێنە گەورەکە: بەشێک لە پڕۆژە خزمەتگوزارییەکانی عێراق بەهۆی گەندەڵی و بەهەدەردانی پارەوە زۆرجار ڕووبەڕووی شکست و وێرانبوون دێن، چەندین جاریش خاوەن پڕۆژەکان دراونەتە دادگا بەڵام ئەو دیارەیە تاوەکو ئێستا کۆتایی نەهاتووە. 

لێدوانی فەرمی: سەرچاوەیەکی حکومەتی پارێزگاکە بە میدیای عێراقی ڕاگەیاندووە،  موهەندە عەتابی، پارێزگاری مووسەننا بەشی یاسایی پارێزگاکەی ڕاسپاردووە سکاڵای یاسایی دژی ئەو کۆمپانیایانە تۆماربکات کە پڕۆژەی ژێرخانیان ئەنجامداوە و لەم شەپۆلی بارانبارینەی چەند ڕۆژی ڕابردوو لە ئاستی باران خۆیان نەگرتووە و شکستیان هێناوە، چونکە پێوەرە هونەرییەکانیان تێدانەبووە.

دەشڵێت، بەشێک لە پڕۆژەکان تەمەنیان کەمتر لە چوار ساڵە و بەشێکی دیکەشیان چەند مانگێکە خراونەتە خزمەتی هاووڵاتییانەوە، بۆیە دەبێت کۆمپانیا جێبەجێکارەکان بەرپرسیارییەتی ئەو شکستەیان هەڵبگرن چونکە دووبارە دروستکردنەوەیان قورس و پڕ خەرجییە.