سوودانی فەرمانی یەکخستنی کارتی نیشتمانی و نیشتەجێبوون دەدات

ئاڤا نیوز

سەرۆکوەزیرانی عێراق، فەرمانی خێراکردنی پڕۆژەی یەکخستنی کارتی نیشتمانی و کارتی نیشتەجێبوون دەدات، بە ئامانجی کەمکردنەوەی ڕێکارە ئیدارییەکان و پێشکەشکردنی خزمەتگوزاریی ئەلیکترۆنیی یەکگرتوو بە هاووڵاتیان. ئەم پڕۆژەیە سیستەمی کارتی نیشتمانیی وەک بنەمای سەرەکی داتای هاووڵاتیان پەسەند دەکات.

چیرۆکی سەرەکی: ئەمڕۆ یەکشەممە، محەممەد شیاع سوودانی، سەرۆکوەزیرانی عێراق، سەرپەرشتی کۆبوونەوەیەکی تایبەتی کرد سەبارەت بە پرۆژەی بەئەلیکترۆنیکردنی (حوکمڕانی) کارتی نیشتمانی و یەکخستنی لەگەڵ کارتی نیشتەجێبوون.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق لە کۆبوونەوەکەدا پێشنیازەکانی تایبەت بە پڕۆژەکە تاوتوێ کران، کە بریتی بوون لە پەسەندکردنی سیستەمی کارتی نیشتمانیی وەک سیستەمی سەرەکی بۆ بەڕێوەبردنی داتای کەسیی هاووڵاتیان. هەروەها بڕیاردرا داتای کارتی نیشتەجێبوون زیاد بکرێت و کارتی نیشتمانیی وەک یەک بێت و پێویست بە دەرکردنی کارتی نیشتەجێبوونی جیاواز نەکات.

ئەوەی ئێستا ڕوودەدات: سەرۆکوەزیران فەرمانی دا بە خێرا تەواوکردنی پڕۆژەکە و فراوانکردنی گۆڕینی بەڵگەنامەکانی دیکە بۆسەر کارتی نیشتمانی، بەشێوەیەک ببێتە سەرچاوەیەکی نیشتمانیی ئەلیکترۆنیی یەکگرتوو. ئەمەش دەبێتە هۆی سووککردنی باری سەرشانی هاووڵاتیان بە کەمکردنەوەی بەڵگەنامەکان و کەمکردنەوەی سەردانیکردنی فەرمانگەکان.

ئەوەی پێویستە بیزانیت: پڕۆژەکە نوێکردنەوەی هەموو نووسینگەکانی کارتی نیشتمانیی و ژێرخانەکانیان لە سەرجەم شارەکاندا لەخۆدەگرێت. هەروەها نوێکردنەوەی کۆمپیوتەر و بەرنامە ئەلیکترۆنییەکان بە نوێترین ڕێگەکانی تەکنۆلۆژیای جیهانیی بۆ باشترکردنی خزمەتگوزارییەکان و زیاترکردنی شەفافیەت.