کۆمیسیۆن وادەی تیروپشکی پێدانی ژمارەی بە حیزب و کاندیدەکان دیاریکرد

ئاڤا نیوز 

کۆمسیۆنی باڵای سەربەخۆی هەڵبژاردنەکانی عێراق ڕایگەیاند، لە 11ـی ئەم مانگە تیروپشکی پێدانی ژمارە بۆ ناوی ئەو کاندید و لیستانە دەکرێت کە لە نوێوە ناوی خۆیان بۆ هەڵبژاردنی پەرلەمانی کوردستان تۆمار کردووە.

 

وێنە گەورەکە: لە ڕۆژی 18-07-2024، کۆمسیۆنی هەڵبژاردنەکان دەرگای تۆمارکردنی لیست و بەربژێرانی بۆ هەڵبژاردنی پەرلەمانی کوردستان داخست. 

 

لێدوانی فەرمی: جومانە غەلای، گوتەبێژی کۆمسیۆنی باڵای سەربەخۆی هەڵبژاردنەکانی عێراق بە ئاڤا نیوزی ڕاگەیاند: لە کۆبوونەوەی ئەنجوومەنی کۆمیسیۆن بڕیار دراوە ڕۆژی 11-08-2024 تیروپشکی بەخشینی ژمارە بە کاندید و لیستەکان لە ئۆفیسی هەولێر کۆمیسیۆن ئەنجام بدرێت.

 

گۆشەیەکی دیکەی دیمەنەکە: کۆمیسیۆن بۆ سەر سندووقەکانی دەنگدان پێویستی بە 43 هەزار کارمەند بەشێوەی گرێبەست هەیە و ڕاهێنانیان پێدەکرێت.

 

ئەوەی پیویستە بیزانیت: دوو ھاوپەیمانی و 13 حیزب و 85 بەربژێری سەربەخۆ ناوی خۆیان بۆ خولی شەشەمی هەڵبژاردنی پەرلەمانی کوردستان تۆمار کردووە.