بەرەی تورکمانی: پێکهێنانی حکومەتی خۆجێيی کەرکووک بەبێ ڕێککەوتن ڕەتدەکەینەوە

ئاڤا نیوز  

بەرەی تورکمانی ڕەتیدەکاتەوە بەبێ ڕێککەوتنی پێشوەختەی هەرسێ پێکهاتەی کورد، عەرەب و تورکمان، ئامادەی کۆبوونەوەی هەفتەی داهاتووی ئەنجوومەنی پارێزگای کەرکووک بێت.

وێنە گەورەكە: بڕیاربوو ئەمڕۆ نۆ ئەندامی ئەنجوومەنی پارێزگای کەرکووک کۆببنەوە و پۆستی سەرۆکی ئەنجوومەنەکە هەڵبژێرن، بەڵام دواتر لەسەر داوای سەرۆکوەزیرانی عێراق کۆبوونەوەکەیان بۆ سەرەتای هەفتەی داهاتوو دواخست.

لێدوانی فەرمی: ئەحمەد ڕەمزی، ئەندامی بەرەی تورکمانی لە ئەنجوومەنی پارێزگای کەرکووک بە ئاڤا نیوزی ڕاگەیاند: گفتوگۆکان بۆ پێکهێنانی حکومەتی خۆجێی تائێستا نەگەیشتوونەتە دەرئەنجام، داوا دەکەین بە ڕێککەوتنی نێوان پێکهاتەکان حکومەتی خۆجێی پارێزگاکە پێکبهێنرێت.

زانیاریی زیاتر: بەرەی تورکمانی داوا دەکات پۆستی پارێزگار و جێگرانی پارێزگار و سەرۆکی ئەنجوومەنی پارێزگای کەرکووک بەشێوەی خولی لەنێوان کورد و عەرەب و تورکمان بەڕێوەببرێن، دابەشكردنی پۆستی پارێزگاریش بەشێوەی دوو ساڵ بە دوو ساڵ لەنێوان پێکهاتەی کورد و عەرەب ڕەتدەکاتەوە.