گەشتوگوزار میکانیزمێکی نوێی کۆکردنەوەی ئاماری گەشتیاران پەیڕەو دەکات

ئاڤا نیوز

دەستەی گەشتوگوزاری هەرێمی کوردستان، میکانیزمێکی نوێی بۆ کۆکردنەوەی ئاماری گەشتیاران پەیڕەو دەکات.

وێنە گەورەکە: ساڵانە ڕێژەی هاتنی گەشتیاران بۆ ناوچە گەشتیارییەکانی هەرێمی کوردستان بەرز دەبێتەوە، دەستەی گەشتوگوزار دەیەوێت پۆلێنی ئەو گەشتیارانە بکات کە ساڵانە دێنە هەرێمی کوردستان.

ئەوەی پێويستە بیزانیت: گەشتیاریی وەک بنەمایەک بۆ زیادکردنی داهات سەیر دەکرێت، ئێستا داهاتی کەرتی گەشتیاری لەهەرێمی کوردستان %500 زیادیکردووە.

لێدوانی فەرمی: ئیبراهیم عەبدولمەجید، بەڕێوەبەری ڕاگەیاندنی دەستەی گەشتوگوزاری هەرێمی کوردستان بە ئاڤا نیوزی گوت: "لە ڕێگەی لیژنەیەکی هاوبەش سیستەمێک جیبەجێ دەکرێت، بۆ پۆلینی ئەو گەشتیارانەی دێنە هەرێمی کوردستان لەسەر بنەمای ڕەگەزنامە، ڕەگەز، تەمەنیان، چەند ڕۆژ دەمێننەوە، سەردانی چەند ناوچە دەکەن و  ئەو بڕەی خەرجیدەکەن جیادەکرێنەوە".

باکگراوند: لە ماوەی شەش مانگی ساڵی ڕابردوو چوار ملیۆن و 500 هەزار گەشتیار و سەردانیکار لە هەرێمی کوردستان تۆمار کراون، ئەمساڵ لە چوار مانگی سەرەتای ساڵدا زیاتر لە دوو ملیۆن گەشتیار هاتوونەتە هەرێمی کوردستان.