ئاڤا ناوی ئەو کۆچبەرانە ئاشکرا دەکات کە تەرمەکانیان دەگەڕێنرێنەوە هەولێر

ئاڤا نیوز

 

ئەمڕۆ تەرمی 13 كۆچبەری كورد كە لە ماوەی ڕابردوودا لە كەناراوەكانی ئیتاڵیان خنكاون، دەگوزارێنەوە هەولێر.

 

وێنە گەورەکە: ڕۆژی 17-6-2024 دوو بەلەم لە کەناراوەکانی ئیتاڵیا تێکشکان، کە ژمارەیەکی زۆر کۆچبەریان هەڵگرتبوو، زۆرینەی سەرنشینەکان گیانیان لەدەست دا و بەشێکیان بێسەروشوێن بوون و لەنێویاندا دەیان کۆچبەری کورد هەبوون.

 

لێدوانی فەرمی: ڕێزان حەمەساڵح، نوێنەری حکومەتی هەرێمی کوردستان لە ئیتاڵیا بە ئاڤا نیوزی گوت: لەسەر ئەركی حكومەتی هەرێمی كوردستان، کاتژمێر 6:30 بۆ 7:30ی ئێوارەی ئەمڕۆ هەینی 2-8-2024، تەرمەكان لە ئیتاڵیاوە دەگەیێنرێنە فڕۆکەخانەی نێودەوڵەتیی هەولێر.

 

زانیاریی زیاتر: لە كۆی 40 تەرمی دۆزراوەی نێو یەختە تێكشكاوەكە تەنیا 13 تەرمیان ناسراونەتەوە و تیمەكان دڵنیابوونەتەوە كە كوردن، ئەمڕۆ دەگوازرێنەوە بۆ شاری هەولێر، هەشتیان خەڵكی باشووری كوردستان و پێنجەكەی دیكە خەڵكی ڕۆژهەڵاتی كوردستانن.

 

زانیاریی بەدەستهاتوو: ئەو تەرمانەی ئەمڕۆ دەگوازرێنەوە بۆ هەولێر پێکهاتوون لە هەژار محەمەد، دەریاس ئارام، پاڵەوان عومەر، میران قادر، نیلام هۆكار، ئارام عەبدولرەحمان، خونچە مەلانەبی، میلان خدر، حەدیس زنجیری، ماكان نەجفری، موعین عەلی پوور، پێشەوا دەروێش و پژمان ناسمارا.