سەرۆکوەزیران بارزانی: هەوڵەکانمان بەردەوامە بۆ ئاساییکردنەوەی دۆخی شنگال

ئاڤا نیوز

سەرۆکوەزیران بارزانی ڕایگەیاند هەوڵەکانیان بەردەوامە بۆ ئاساییکردنەوەی دۆخی شنگال و جەخت لە جێبەجێكردنی ڕێككەوتننامەی شنگال دەکاتەوە.

وێنە گەورەکە: ئەمرۆ 10 ساڵ بەسەر جینۆسایدکردنی کوردانی ئێزدی لە شنگال و دەوروبەری تێدەپەڕێت، كە لە ئەنجامی هێرش و پەلاماری داعش، هەزاران كەس لە دانیشتووانی دەڤەری شنگال، کۆمەڵکوژ کران و دەیان هەزاری دیکەش بێسەروشوێن و ئاوارە بوون.

لێدوانی فەرمی: سەرۆکوەزیران بارزانی ڕایگەیاند: هەرچەندە 10 ساڵ بەسەر ئەم تاوانە تێدەپەڕێت، بەڵام ئیش و ئازار و مەینەتییەکانی خوشک و برایانی ئێزدی کۆتایی نەهاتووە و هێشتاش ژمارەیەکی زۆریان بێسەروشوێنن و بەهۆی خۆسەپێنی میلیشا و هێزە چەکدارەکانی دەرەوەی یاسا لە شنگال، دۆخی دەڤەرەکە ئاسایی نەبووەتەوە و ئاوارەکان نەیانتوانیوە بگەڕێنەوە بۆ ناوچەکانیان.

زانیاریی زیاتر: حكومەتی هەرێمی كوردستان، دووپاتی دەکاتەوە بەردەوامە لە هەوڵەکانی لەگەڵ حکومەتی فیدراڵ  بۆ ئاساییکردنەوەی دۆخی نالەباری شنگال و دەوروبەری و کار بۆ ئاوەدانکردنەوەی ناوچەکە دەکات بۆ ئەوەی زەمینە بۆ گەڕاندنەوەی ئێزدییە ئاوارەکان بۆ شوێنەکانیان خۆش بکرێت. 

لە لایەکی دیکەوە: سەرۆکوەزیران بارزانی جەخت لە جێبەجێكردنی ڕێككەوتننامەی شنگال وەکو خۆی دەکاتەوە بۆ ئەوەی ئارامی و سەقامگیریی بۆ ناوچەکە بگەڕێتەوە و پاراستن و بەڕێوەبردنی دەڤەرەکەش بدرێتە دەست خەڵکی ڕەسەنی شنگال.