کوردستان فاوندەیشن پڕۆژەیەکی گرنگ و ناوازە لە سلێمانی جێبەجێ دەکات

ئاڤا نیوز

دامەزراوەی کوردستان فاوندەیشن و وەزارەتی پەروەردەی هەرێمی کوردستان، پڕۆژەیەکی گرنگ و ناوازە وەکو قۆناغی ئەزموونیی لە چەند قوتابخانەیەکی سلێمانی جێبەجێ دەکەن، پڕۆژەکە لە داهاتوودا کەرتی پەروەردە دەباتە قۆناغێکی نوێ.

چیرۆکی سەرەکی: پرۆژەکە بریتییە لە بەکارهێنانی سمارت بۆرد لە شێوازی وانەوتنەوەدا، کە شێوازێکی تەواو جیاواز و پێشکەوتووە، چونکە مامۆستایان لەکاتی وانەوتنەوەدا لەبری بەکارهێنانی ماجیک و شێوازە کۆنەکان، بۆرد و شاشەی زیرەک بەکاردەهێنن.

بۆچی گرنگە؟ لەم شێوازەدا تازەیەدا مامۆستایان بەڤیدیۆ و وێنەی ڕەنگاورەنگ و شێوازی لەمس و دیجیتاڵی، وانەکان بە قوتابیان دەڵێن، ئەمەش گۆڕانکارییەکی گەورەیە لە شێوازی وانە وتنەوەدا. 

شێوازی جێبەجێکردن: ئەم پرۆژەیە ئێستا لە شاری سلێمانی لە قوتابخانەی ئایندەی بنەڕەتی و چەند قوتابخانەیەکی تر پەیڕەو دەکرێت. لە قوتابخانەی ئایندە، لە قۆناغی یەکەمدا ڕێکخراوی کوردستان فاوندەیشن شەش سمارت بۆردی دابین کردووە.

لێدوانی فەرمی: مامۆستا بورهان خالید، بەڕێوەبەری قوتابخانەی ئایندە بە ئاڤا میدیای ڕاگەیاند، بەکارهێنانی سمارت بۆرد لە قوتابخانەکەمان پرۆژەیەکی گرنگی وەزارەتی پەروەردە و کوردستان فاوندەیشنە، چونکە بۆردەکان کاری زۆر پێشکەوتووی لەسەر دەکرێت و جێگەی دڵخۆشی مامۆستایان و قوتابیەکانیشە.

- دانانی سمارت بۆرد بۆ قوتابخانەکەمان، شێوازێکی زۆر پێشکەوتووە، هەم بۆ مامۆستایان ئاسانکارییە هەم بۆ قوتابیانیش شێوازێکی نوێ و هاوچەرخە، چونکە هەموو وانەکان لەسەر شاشەیەکی گەورە بەشێوەیەکی جوان و ئاسان پێشکەشی قوتابیان دەکرێت.

قۆناغی داهاتوو: بڕیارە لە داهاتوویەکی نزیکدا لە سەرجەم قوتابخانەکانی هەرێمی کوردستاندا ئەم پرۆژە گرنگە جێبەجێ بکرێت و لەبری وایت بۆرد سمارت بۆرد بەکاربهێنرێت.