مەسرور بارزانی لە ئیمارات وتارێکی گرنگ و ستراتیژی پێشکەش دەکات

ئاڤا نیوز

مەسرور بارزانی لە لووتکەی حکومەتەکان لە دووبەی وتارێکی گرنگ و ستراتیژی پێشکەش دەکات و دیدگای هەرێمی کوردستان بۆ ئایندەی حوکمڕانی لە ناوچەکەدا بۆ سەرکردەکانی جیهان باس دەکات.

وێنە گەورەکە: لە دووبەی لووتکەی حکومەتەکان بە بەشداریی نوێنەرانی 150 وڵات بەڕێوەدەچێت، ئەمڕۆ دەستی پێکرد و دوو ڕۆژی تر بەردەوام دەبێت. یەکێک لە گەورەترین سەکۆ سیاسی و ئابوورییەکانی جیهانە، مەسروور بارزانی، سەرۆکوەزیرانی کوردستان لەپاڵ 60 سەرۆک و سەرۆکوەزیرانی وڵاتان وەک سەرکردەیەکی کاریگەر بانگهێشت کراوە.

چیرۆکی سەرەکی: مەسرور بارزانی سبەی چوارشەممە 4-2-2026 لە لووتکەکەدا وتارێک پێشکەش دەکات.

- ئەمڕۆش لە لووتکەکە ڕۆژێکی پڕ لە چالاکی دیپلۆماسی بەڕێکرد و زنجیرەیەک کۆبوونەوەی ئاستبەرزی لەگەڵ سەرکردە و بەرپرسانی وڵاتانی ناوچەکە و جیهان ئەنجام دا، تێیدا پێگەی کوردستان وەک چەقی هاوسەنگیی سیاسی دووپات کرایەوە. لە کۆبوونەوەکانیشدا، پەیامێکی ڕوونی دا کە کوردستان بەشێکە لە چارەسەر نەک کێشە.

ئەوەی پێویستە بیزانیت: مەسرور بارزانی لەلایەن شێخ محەممەد بن ڕاشد ئال مەکتووم، سەرۆکوەزیرانی ئیمارات بەفەرمی بانگهێشت کراوە. ئێوارەی دوێنێ دووشەممە پێشوازییەکی جیاوازی لێ کرا، کاتێک گەیشتە دووبەی ئاڵای کوردستان لەسەر شاشە گەورەکان نمایش کرا.

- ئەمەش ئاماژەیەکی ڕوونی دیپلۆماسییە بۆ قووڵیی پەیوەندییە دووقۆڵییەکانی نێوان  کوردستان و دەوڵەتی ئیمارات، مەسروور بارزانی و سەرکردەکانی ئەو وڵاتە. ئەم میواندارییە تایبەتە، سەلمێنەری ئەو دۆستایەتییە قووڵ و ستراتیژییەیە کە لەنێوان هەولێر و دوبەی بنیات نراوە.

بۆچی گرنگە: ئەم لووتکەیە تەنها کۆبوونەوەی حکومەتەکان نییە، بەڵکو سەلماندنەوەی ئەو ڕاستییەیە کە هەرێمی کوردستان بە سەرکردایەتیی مەسروور بارزانی، بووەتە کارەکتەرێکی سەرەکی لە هاوکێشە جیهانییەکاندا و چیدیکە ناتوانرێت لە بڕیارە گرنگەکانی ناوچەکەدا پشتگوێ بخرێت.