هەواڵی کوژرانی سەیفولئیسلام کوڕی موعەممەر قەزافی بڵاو دەبێتەوە

ئاڤا نیوز

هەواڵی کوژرانی سه‌یفولئیسلام قه‌زافی تەمەن 53  ساڵ کوڕی موعەممەر قەزافی، سەرۆکی پێشووی لیبیا لەلایەن کەسە نزیکەکانییەوە بڵاوکرایەوە و باسیان لەوەکردووە، ناوبراو لە شاری ئەلزنتانی ڕۆژئاوای لیبیا لەلایەن چوار کەسەوە کوژراوە.

ئەوەی پێویستە بیزانیت: عەبدوڵڵا عوسمان، ڕاوێژکاری سیاسیی سه‌یفولئیسلام قه‌زافی و کەناڵی عەرەبیەی سعودیش لە خێزانی قەزافییەوە هەواڵی کوژرانی سه‌یفولئیسلامیان بڵاوکردەوە و دەڵێن، سه‌یفولئیسلام لەناو باخچەی ماڵەکەی لەلایەن چوار کەسەوە هێرشی کراوەتەسەر و کوژراوە.

ئەوەی لەبارەیەوە دەگوترێت: لیوای 444ی سەر بە حکومەتی لیبیاش کە بە کوشتنی سه‌یفولئیسلام تۆمەتبار کراوە، لە ڕاگەیێنراوێکدا هەواڵەکەی ڕەتکردەوە و ڕایگەیاند، هیچ هێزێکیان لەناو شاری ئەلزنتان نییە و پەیوەندییان بەو ڕووداوەوە نییە.

زانیاریی لەسەر  سه‌یفولئیسلام قه‌زافی:

- کوڕی گەورەی قەزافییە لە خێزانی دووەمی.

-ساڵی 1972 لەدایک بووە.

- ساڵی 2000 ڕۆڵی پێدرا و لە پرۆسەی سیاسی لیبیادا دەرکەوت.

- لە خۆپیشاندانەکانی ساڵی 2011 بەتوندی پشتیوانی دەسەڵاتەکەی باوکی کرد، بەڵام لە تشرینی دووەمی هەمان ساڵدا لەلایەن سوپای ئۆپۆزسیۆنی لیبیاوە دەستگیر کرا

- ساڵی 2015 دادگای لیبیا سزای لەسێدارەدانی بەسەردا سەپاند

- ساڵی 2017 بەر لێبووردنی گشتی کەوت و ئازاد کرا

- ساڵی 2021 خۆی بۆ هەڵبژاردنی سەرۆکایەتی لیبیا کاندید کرد، بەڵام بەهۆی ئەوەی پێشینەی تاوانی هەبوو و بە زیندانیکردن حکوم درابوو، یەکێک لە مەرجەکانی کاندیدبوونی تێدانەبوو، بەو هۆیەش لە کێبەرکێی هەڵبژاردن دوورخرایەوە.

- ساڵی 2023 رافائیل لوزون، سەرۆکی یەکێتیی جووەکانی لیبیا ڕایگەیاند، سەیفولئیسلام "داوای لێکردووین هاوکاری بکەین تا بۆ دەسەڵات بگەڕێتەوە".