پەرلەمانتارێک حکومەتی عێراق بەهۆکاری جێبەجێنەکردنی ڕێککەوتنی شنگال دەزانێت

ئاڤا نیوز

پەرلەمانتارێک، حکومەتی عێراق بە هۆکاری جێبەجێ نەکردنی ڕێککەوتنی شنگال دەزانێت و دەڵێت "لایەنەکانی نزیک لە حەشدی شەعبی نایانەوێت ئەو ڕێککەوتنە سەربگرێت".

وێنە گەورەکە: ڕۆژی 09-10-2020، بە چاودێری مستەفا کازمی، سەرۆکوەزیرانی پێشووی عێراق و سەرۆکوەزیران بارزانی، ڕێککەوتنی شنگال لە بەغدا واژۆ کرا، ئامانج لێی ئاسایی کردنەوەی دۆخی ئەمنی، کارگێڕی، ئاوەدانکردنەوەو گەڕاندنەوەی ئاوارەکان بوو.

لێدوانی فەرمی: ماجد شنگالی، ئەندامی پەرلەمانی عێراق بە ئاڤا نیوزی گوت: هەندێک لایەنی سیاسی بە تایبەت ئەوانەی لە حەشدی شەعبی نزیکن نایانەوێت ڕێککەوتنەکە جێبەجێ بکرێت و ئامانجیشیان ئەوەیە شنگال لە هەرێمی کوردستان دووربخرێتەوە.

زانیاریی زیاتر: بەگوتەی ماجد شنگالی، حکومەتی عێراق هیچ خاڵێکی ڕێککەوتنەکەی جێبەجێ نەکردووە، هەنگاوی جدیشی نییە بۆ ئەو مەبەستە.

ڕێککەوتنەکە بەمجۆرەیە: 
-   دیاریکردنی قایمقامێکی نوێ بۆ شنگال  و پێداچوونەوە بە سەرجەم پۆستە کارگێرییەکانی دیکە.
-   دەبێت دۆسیەی ئەمنی شنگال لە دەستی پۆلیس و دەزگای ئەمنی و هەواڵگری بێت، سەرجەم گرووپە چەکدارەکان بچنە دەرەوە لە قەزاکە.
-   دامەزراندنی دوو هەزار و 500 کەس بۆ پاراستنی ئاسایشی قەزاکە.
-  پێکهێنانی لیژنەیەکی هاوبەش بۆ دووبارە ئاوەدانکردنەوەی شنگال.
-  گەڕانەوەی ئاوارەکان.