شنگالییەکان چاوەڕێی قەرەبووکردنەوە دەکەن

ئاڤا نیوز

ئەمڕۆ 10 ساڵ بەسەر هێرشی داعش بۆ سەر قەزای شنگال و گوندەکانی دەوروبەری تێپەڕدەبێت، لەو کاتەوە تاوەکو ئێستا خەڵکە زیانلێکەوتووەکەی ئەو شارە چاوەڕێی قەرەبووکردنەوە دەکەن لە حکومەتی عێراق.

وێنە گەورەکە: لەگەڵ هێرشەکەی بۆ سەر  شنگال، داعش زیانی ماددی زۆری بەژێرخانی ئەو قەزایە گەیاند و  ژمارەیەکی زۆری خانووی ڕووخاند.

لێدوانی فەرمی: ڤیان دەخیل، گوتەبێژی فراکسیۆنی پارتی لە پەرلەمانی عێراق بە ئاڤا نیوزی ڕاگەیاند: کاری زۆریان لە کەیسی ئێزدییەکان کردووە بە مەبەستی قەرەبووکردنەوەیان، بەڵام ئەو لیژنەیەی کە بۆ قەرەبووکردنەوە پێکهاتووە هەر جارێک بە بیانوێک خۆی لە بابەتەکە دەدزێتەوە.

زانیاریی زیاتر: 12 هەزار دۆسیەی قەرەبووکردنەوەی ئاوارە ئێزدییەکان هەیە، بەڵام لەو ژمارەیە تەنیا 20 خانەوادە قەرەبووکراونەتەوە، قەرەبووکردنەوەی خەڵکی شنگال لە کارە لە پێشینەکانی حکومەتی عێراقدا نییە، ئەو پرسە بە سیاسی کراوە، شوێنی دیکە هەن قەرەبوو کراونەتەوە، ڤیان دەخیل وادەڵێت.

لە لایەکی دیکەوە: جەعفەر سمۆ، ئەندامی دەستەی باڵای بنكەی ڕۆشنبیریی لالش بە ئاڤا نیوزی گوت: ئێمە سەرمان لە عێراق سوڕماوە هەر وەک بڵێی شنگال بە قەزایەکی سەر بەخۆ دانانێت، چونکە هیچ قەرەبووکردنەوەیەکی بۆ کوردانی ئێزدی نییە و ئێمە لێی بێ هیوا بووین.