سەرۆک بارزانی: پێویستە دۆخی نائاسایی شنگال كۆتایی بێت

ئاڤا نیوز

سەرۆک بارزانی، جەخت لەوە دەکاتەوە بەهەموو توانایەک پاڵپشتی ماف و داواکاریی خوشک و برا ئێزدییەکان و دانیشتووانی دەڤەری شنگال دەکات، دەشڵێت " پێویستە ئەو دۆخەی 10 ساڵە بەسەر خەڵکی دەڤەرەکەدا سەپێنراوە کۆتایی بێت".

پەیامی فەرمی: سەرۆک بارزانی لە یادی کۆمەڵکوژی شنگال دا ڕایگەیاند: جینۆسایدی شنگال و ئەو تاوانەی داعش دژی کوردانی ئێزدی برینێکە لەسەر جەستەی گەلی کوردستان، ئەو تاوانە هاوشێوە و درێژەکراوەی ئەو جینۆساید و کۆمەڵکوژی و تاوانانەیە کە بە درێژایی مێژوو بەرانبەر گەلی کوردستان ئەنجام دراوە، خوشک و برا ئێزدییەکانمان بە هۆی کوردبوون و بیروباوەڕی ئایینیانەوە کەوتنە بەر شاڵاوی ڕق و دڕندەیی تاوانبارانی داعش و جینۆساید کران.

زانیاریی زیاتر: سەرۆک بارزانی جەخت لەوە دەکاتەوە بەهەموو توانایەک پاڵپشتی ماف و داواکاریی کوردانی ئێزدی و دانیشتووانی دەڤەری شنگالن، پێویستە ڕێککەوتنی نێوان حکومەتی هەرێمی کوردستان و حکومەتی عێراق لەمەڕ ئاساییکردنەوەی دۆخی شنگال جێبەجێ بکرێت و ئەو دۆخە نایاسایی و نائاساییەی 10 ساڵە بە ناهەق بەسەر خەڵکی ئەو دەڤەرە سەپێنراوە کۆتایی بێت.

گۆشەیەکی دیکە: سەرۆک بارزانی ئاماژە بەوەش دەکات پێویستە کۆتایی بەوە بێت لایەنەکان ژان و ئازارەکانی شنگال بۆ مەرامی سیاسی و خۆسەپاندن و ئاڵۆزترکردنی دۆخی شنگال بەکار بهێنن و دەبێ ڕێگە بدرێت خوشک و برا ئێزدیەکانمان لە شنگال بە سەربەرزی بگەڕێنەوە سەر ماڵ و حاڵی خۆیان و لە ئاشتی و ئارامیدا بژین.