تەندروستیی سلێمانی بۆ هاووڵاتیان: شەش مانگ جارێك تانكیی ماڵەكانتان پاك بكەنەوە

ئاڤا نیوز

 

بەڕێوەبەرایەتیی خۆپاراستنی تەندروستیی سلێمانی، سەبارەت بە بڵاوبوونەوەی پەتای سكچوون و ڕشانەوە پەیامێك ئاراستەی هاووڵاتیان دەكات.

 

وێنە گەورەكە: چەند هەفتەیەكە پەتای سكچوون و ڕشانەوە لە سنووری پارێزگای سلێمانی بڵاوبووەتەوە, بەڕێوەبەرایەتیی خۆپاراستنی تەندروستیی سلێمانیش پەیامێك ئاراستەی دانیشتووانی ناوچەكە دەكات و ڕێنوێنیی و خۆپارێزییان لێدەکات.

 

ڕاگەیێنراوی فەرمی: بەڕێوەبەرایەتییەكە لە ڕاگەیێنراوێكدا داوا لە هاووڵاتیان دەكات، بۆ خۆپاراستن لە پەتای سكچوون، تانكى ئاوى خواردنه‌وه‌ى ماڵه‌كانیان لایه‌نى كه‌م به‌ شه‌ش مانگ جارێك پاک بکەنەوە، هاوكات ده‌بێت به‌رده‌وام سه‌ری تەنکیەکانیان داپۆشراوبێت، هەروەها پێویسته‌ سه‌وزه‌ و میوه‌ به‌باشى بشۆرێته‌وه‌.

 

زانیاریی زیاتر: بەڕێوەبەرایەتیی خۆپاراستنی تەندروستیی سلێمانی داواش دەكات، هاووڵاتیان خواردنى سه‌ر عه‌ره‌بانه‌ و ده‌ستگێره‌كان نه‌خۆن، هاوكات دڵنیا بن لە سەرچاوەی ئاوی خواردنەوە و دەستەكانیان بە بەردەوامی بە سابوون بشۆن.

 

ئەوەش بزانە: بەپێی ڕێنوێنییەكان، دەبێت له‌ كاتى توشبوون به‌ سكچوون و ڕشانه‌وه‌، شله‌مه‌نى زۆر بخورێتەوە و كەسی تووشبوو بە زووترین كات سەردانی نزیكترین مەڵبەندی تەندروستی بكات.

 

ئەوەی پێویستە بیزانیت: بەگوێرەی ئاماری مانگێکی نەخۆشخانەی د.جەمال ئەحمەد ڕەشیدی منداڵان لە سلێمانی، هەزار و 130 منداڵ بەهۆی سکچوون و ڕشانەوە و وشکبوونەوە خەوێنراون، ئەمەش بۆ هەر ڕۆژێک 36 حاڵەت دەکات.