ئاڤا نیوز ناوەڕۆکی دوو داواکاری سوودانی لە لایەنە کوردییەکانی کەرکووک ئاشکرا دەکات

ئاڤا نیوز

 

سەرۆکوەزیرانی عێراق داوا لە لایەنەکانی کورد و پێکهاتەکانی دیکەی کەرکووک دەکات پێش تەواوبوونی وادەی یاسایی، پارێزگار و سەرۆکی ئەنجوومەنی پارێزگای کەرکووک هەڵبژێرن و حکومەتێکی خۆجێیش بەبێ پەراوێزخستنی هیچ لایەنێک پێکبهێنرێت.

 

لێدوانی فەرمی: د.ئەحمەد کەرکووکی، ئەندامی فراکسیۆنی "کەرکووک هێز و ئیرادەمانە" لە ئەنجوومەنی پارێزگای کەرکووک بە ئاڤا نیوزی ڕاگەیاند: محەممەد شیاع سوودانی، سەرۆکوەزیرانی عێراق، لە کۆبوونەوەیدا لەگەڵ ئەندامانی فڕاکسیۆنەکانی کەرکووک هێز و ئیرادەمانە بە ئامادەبوونی ئەندامی فراکسیۆنی بابلیۆن، جەختی لە پێکهێنانی حکومەتێکی فرەیی بۆ زیاتر ئاوەدانی پارێزگاکە کردەوە.

 

لەلایەکی دیکەوە: "چاوەڕێین بەزووترین کات و پێش تەواوبوونی ئەو وادە یاساییەی بۆ ئەندامان دانراوە، پۆستەکانی پارێزگار و سەرۆکی ئەنجوومەنی پارێزگا و جێگرەکانیان یەکلایی بکەنەوە"، سوودانی وای بە فڕاکسیۆنەکانی یەکێتی و بابلیۆن وتووە.

 

ئەوەی پێویستە بیزانیت: لایەنە براوەکانی ئەنجوومەنی پارێزگای کەرکووک دابەشی سەر دوو بەرە بوون، بۆیە تاوەکو ئێستا نەتوانراوە حکومەتی خۆجێی پێکبهێنن، سەرۆکوەزیرانی عێراقیش لە میانی دیدارەکانی لەگەڵ پێکهاتەی عەرەبی و تورکمانی پارێزگاکە جەختی لەسەر ئەوە کردووەتەوە کە نابێت هیچ پێکهاتەیەک پەراوێز بخرێت.