چوارچێوەی هەماهەنگی: ئەم هەفتەیە پۆستی سەرۆکی پەرلەمان یەکلا دەبێتەوە

ئاڤا نیوز

 

ئەندامێکی چوارچێوەی هەماهەنگی ئاشکرای دەکات، لەم هەفتەیەدا هەوڵەکان بۆ دیاریکردنی سەرۆکی پەرلەمان چڕ دەکرێنەوە و ئەگەر سوننەکانیش ڕێکنەکەون، پۆستەکە بە دەنگدان یەکلایی دەکرێتەوە.

 

لێدوانی فەرمی: محەممەد زیادی، ئەندامی چوارچێوەی هەماهەنگی لە پەرلەمانی عێراق بە ئاڤا نیوزی گوت: "بە گرنگی دەزانین دیاریکردنی سەرۆکی نوێی پەرلەمان لەلایەن سوننەکانەوە چیتر دوانەکەوێت، بۆیە لەم هەفتەیەدا کۆبوونەوەی لایەنەکان لەسەر ئەو پرسە چڕتر دەبنەوە".

 

زانیاریی زیاتر: "ئەگەر سوننەکان نەتوانن کۆکبن  لەسەر بەربژێرێک، بەدەنگی پەرلەمانتاران لە نێوان سالم عیساوی و مەحموود مەشهەدانی یەکێکیان دەکرێتە سەرۆکی پەرلەمان". محەمەد زیادی ئەمەشی  گوت.

 

باکگراوند: زیاتر لە نۆ مانگە محەممەد حەلبووسی، بە بڕیارێکی دادگەی فیدراڵی لە سەرۆکی پەرلەمان دوور خراوەتەوە. لەو کاتەشەوە سوننەکان بەهۆی ناکۆکییان، نەیانتوانیوە کەسێک وەک  جێگرەوەی هەڵبژێرن و پۆستەکە بە وەکالەت بەڕێوەدەبرێت.